chand aur chakor

thī ik aisī raat ki ham donoñ tanhā the

chāñd bhī ham bhī

chāñd ye bolā

dīvāne aa baat kareñ kuchh

hijr kī raat bahut bhārī hai

maiñ to kab se sard paḌā huuñ

is niile sahrā meñ yūñhī maiñ sadiyoñ se āvāra huuñ

aur tanhā huuñ

dīvāne aa baat kareñ kuchh

tere dil meñ shāyad ab tak koī dahaktā añgāra hai

hijr kī ThanDī raakh kī tah meñ shāyad koī chiñgārī hai

hijr kī raat bahut bhārī hai

dīvāne aa baat kareñ kuchh

maiñ ne sochā

maiñ dhartī kā rahne vaalā

ye niile ākāsh kā baasī

merā is kā mel nahīñ hai

tanhā.ī hai khel nahīñ hai

maiñ ne ek chaman meñ jā kar ḳhushbū ko ye baat batā.ī

chāñd kā bachnā ab mushkil hai

chaar taraf se ghabrā ke us ko maar rahī hai phailī huī niilī tanhā.ī

ḳhushbū ne lī ik añgḌā.ī

aur ye bolī

haañ bas thoḌī der huī

shabnam kuchh is se miltā-jultā

ik paiġhām sā to laa.ī thī

lekin shā.er maiñ kyuuñ jā.ūñ

jis ko tanhā.ī Dastī ho vo ḳhud aa.e

maiñ kyuuñ jā.ūñ

āḳhir mauj-e-havā aatī hai

aur barhana-pā aatī hai

maiñ kyā kartā

maiñ lauT aayā

chāñd judā.ī ke niile sahrā meñ ab tak āvāra thā

aur tanhā thā

merī jānib dekh rahā thā

tab maiñ ne do pañkh lagā.e

koī nahīñ jaatā to na jaa.e maiñ jaatā huuñ

chāñd akelā Dar jā.egā

mar jā.egā

nīche ab ik chāñdnī kī gahrī khaa.ī hai

āvāzoñ kā ik jañgal hai

aur ik dasht-e-tanhā.ī hai

ik sahra-e-rusvā.ī hai

mere thakte baazū meñ aur chāñd meñ shāyad duurī ab bhī utnī hī hai

chāñd abhī tak duur hai mujh se

aur abhī tak

merī jānib dekh rahā hai

aur kahtā hai

dīvāne aa baat kareñ kuchh

hijr kī raat bahut bhārī hai

tere dil meñ shāyad ab tak shauq kī koī chiñgārī hai

thi ek aisi raat ki hum donon tanha the

chand bhi hum bhi

chand ye bola

diwane aa baat karen kuchh

hijr ki raat bahut bhaari hai

main to kab se sard paDa hun

is nile sahra mein yunhi main sadiyon se aawara hun

aur tanha hun

diwane aa baat karen kuchh

tere dil mein shayad ab tak koi dahakta angara hai

hijr ki ThanDi rakh ki tah mein shayad koi chingari hai

hijr ki raat bahut bhaari hai

diwane aa baat karen kuchh

main ne socha

main dharti ka rahne wala

ye nile aakash ka basi

mera is ka mel nahin hai

tanhai hai khel nahin hai

main ne ek chaman mein ja kar KHushbu ko ye baat batai

chand ka bachna ab mushkil hai

chaar taraf se ghabra ke us ko mar rahi hai phaili hui nili tanhai

KHushbu ne li ek angDai

aur ye boli

han bas thoDi der hui

shabnam kuchh is se milta-julta

ek paigham sa to lai thi

lekin shaer main kyun jaun

jis ko tanhai Dasti ho wo KHud aae

main kyun jaun

aaKHir mauj-e-hawa aati hai

aur barhana-pa aati hai

main kya karta

main lauT aaya

chand judai ke nile sahra mein ab tak aawara tha

aur tanha tha

meri jaanib dekh raha tha

tab main ne do pankh lagae

koi nahin jata to na jae main jata hun

chand akela Dar jaega

mar jaega

niche ab ek chandni ki gahri khai hai

aawazon ka ek jangal hai

aur ek dasht-e-tanhai hai

ek sahra-e-ruswai hai

mere thakte bazu mein aur chand mein shayad duri ab bhi utni hi hai

chand abhi tak dur hai mujh se

aur abhi tak

meri jaanib dekh raha hai

aur kahta hai

diwane aa baat karen kuchh

hijr ki raat bahut bhaari hai

tere dil mein shayad ab tak shauq ki koi chingari hai