chand ke musafir

zindagī ko dekhā hai zindagī se bhāge haiñ

raushnī ke āñchal meñ tīrgī ke dhāge haiñ

tīrgī ke dhāgoñ meñ ḳhuun kī ravānī hai

dard hai mohabbat hai husn hai javānī hai

har taraf vahī andhā khel hai anāsir kā

tairtā chale sāhil Dūbtā chale dariyā

chāñd ho to kākul kī lahr aur chaḌhtī hai

raat aur ghaTtī hai baat aur baḌhtī hai

ye kashish magar kyā hai reshmī lakīroñ meñ

shaam kaise hotī hai nāchte jazīroñ meñ

har qadam na.ī uljhan sau tarah kī zanjīreñ

falsafoñ ke vīrāne dūsroñ kī jāgīreñ

āñdhiyāñ ujāloñ kī ghan-garaj siyāsat kī

kāñpte haiñ sayyāre raat hai qayāmat kī

jañg se jale duniyā chāñd ko chale pāgal

aañkh par gire bijlī kaan meñ paḌe kājal

daur hai parindoñ kā chheḌ hai sitāroñ se

kā.enāt aajiz hai ham gunāhgāroñ se

zindagi ko dekha hai zindagi se bhage hain

raushni ke aanchal mein tirgi ke dhage hain

tirgi ke dhagon mein KHun ki rawani hai

dard hai mohabbat hai husn hai jawani hai

har taraf wahi andha khel hai anasir ka

tairta chale sahil Dubta chale dariya

chand ho to kakul ki lahr aur chaDhti hai

raat aur ghaTti hai baat aur baDhti hai

ye kashish magar kya hai reshmi lakiron mein

sham kaise hoti hai nachte jaziron mein

har qadam nai uljhan sau tarah ki zanjiren

falsafon ke virane dusron ki jagiren

aandhiyan ujalon ki ghan-garaj siyasat ki

kanpte hain sayyare raat hai qayamat ki

jang se jale duniya chand ko chale pagal

aankh par gire bijli kan mein paDe kajal

daur hai parindon ka chheD hai sitaron se

kaenat aajiz hai hum gunahgaron se