chand

shakl hai merī jaise kaTorā

yā koī chāñdī kā golā

rang hai merā gorā gorā

añdherī shab kā maiñ huuñ ujālā

merā ujālā har jā phailā

baaġh ho bastī yā ho sahrā

chāhtī hai mujh ko sab duniyā

ghar ghar hai merā hī charchā

mujh se bahaltā hai jī sab kā

chhoTā bachcha ho yā būḌhā

haiñ ākāsh pe jitne taare

haiñ ye sab mere hī pyāre

merī chamak ke aage dekhī

raushnī hai in sab kī phīkī

haq ne itnā rutba baḌhāyā

maiñ ne ūñchā darja paayā

tum ai bhole bhāle laḌko

dekho mujh ko aur sabaq lo

fā.eda tum bhī kuchh pahuñchāo

jiyo to kaam sabhoñ ke aao

giit tumhāre gā.egī duniyā

hogā tumhārā har-jā charchā

haq hai 'jauhar' kā ye kahnā

kaam aanā jab tak bhī rahnā

shakl hai meri jaise kaTora

ya koi chandi ka gola

rang hai mera gora gora

andheri shab ka main hun ujala

mera ujala har ja phaila

bagh ho basti ya ho sahra

chahti hai mujh ko sab duniya

ghar ghar hai mera hi charcha

mujh se bahalta hai ji sab ka

chhoTa bachcha ho ya buDha

hain aakash pe jitne tare

hain ye sab mere hi pyare

meri chamak ke aage dekhi

raushni hai in sab ki phiki

haq ne itna rutba baDhaya

main ne uncha darja paya

tum ai bhole bhaale laDko

dekho mujh ko aur sabaq lo

faeda tum bhi kuchh pahunchao

jiyo to kaam sabhon ke aao

git tumhaare gaegi duniya

hoga tumhaara har-ja charcha

haq hai 'jauhar' ka ye kahna

kaam aana jab tak bhi rahna