chaar musafir

nikle safar ko paidal vo chaar ham-safar the

sab apne rāste aur manzil se bā-ḳhabar the

ik falsafī thā un meñ dūsrā thā naa.ī

phir tīsrā sipāhī ganjā thā jis kā bhaa.ī

jañgal meñ raat aa.ī lāzim thā un ko sonā

le kar chale the apne vo oḌhnā bichhaunā

so.e kuchh is tarah vo us meñ hoshiyārī

har ek kā thā pahrā do ghanTe baarī baarī

pahle sipāhī jaagā phir aadhī raat aa.ī

vo so gayā to pahrā dene lagā thā naa.ī

lambe the aur ghane the jo baal us ke sar par

naa.ī ne muuñD Daale tez usturā pher kar

bedār falsafī ko kar ke ye bolā naa.ī

baarī ab aap kī hai uTh jaao mere bhaa.ī

jab haath falsafī ne chañdiyā pe apnī pherā

aape se ho ke bāhar naa.ī ko us ne gherā

ye kyā ġhazab kiyā hai nāhaq use uThāyā

baarī thī falsafī kī ganje ko kyoñ jagāyā

nikle safar ko paidal wo chaar ham-safar the

sab apne raste aur manzil se ba-KHabar the

ek falsafi tha un mein dusra tha nai

phir tisra sipahi ganja tha jis ka bhai

jangal mein raat aai lazim tha un ko sona

le kar chale the apne wo oDhna bichhauna

soe kuchh is tarah wo us mein hoshiyari

har ek ka tha pahra do ghanTe bari bari

pahle sipahi jaga phir aadhi raat aai

wo so gaya to pahra dene laga tha nai

lambe the aur ghane the jo baal us ke sar par

nai ne munD Dale tez ustura pher kar

bedar falsafi ko kar ke ye bola nai

bari ab aap ki hai uTh jao mere bhai

jab hath falsafi ne chandiya pe apni phera

aape se ho ke bahar nai ko us ne ghera

ye kya ghazab kiya hai nahaq use uThaya

bari thi falsafi ki ganje ko kyon jagaya