chaar sal baad

phir aaj chaar saal ba.ad usī jagah khaḌī huuñ maiñ

chabūtre pe gard kī dabīz tah jamī huī

guzartī sā.atoñ ke ġham daroñ meñ chīḳhte hue

udaas khiḌkiyoñ ke rañg dukh meñ bhīgte hue

ye ḳhvāb bistaraoñ kī chādaroñ meñ sūkhte hue

vo phuul ek baar jis tarah yahāñ sajā.e the

usī tarah se un ke zard naqsh kāñpte hue

phir aaj chaar saal ba.ad usī jagah khaḌī huuñ maiñ

havā na-jāne kitnī baar dar pe aa ke jā chukī

na-jāne kitnī baar khiḌkiyoñ pe dastakeñ huiiñ

na-jāne kitne qahqahoñ ko log bhuul bhī chuke

chabūtre pe gard kī dabīz tah ne kah diyā

ki muddatoñ se yaañ kisī ne dāstāñ nahīñ likhī

phir aaj chaar saal ba.ad usī jagah khaḌī huuñ maiñ

haveliyoñ kā tumtarāq TuuT kar bikhar chukā

chaman se ab bahār kā har ik nasha utar chukā

anāniyat shikast-ḳhurda ḳhāmushī meñ Dhal chukī

aur aaj gumbadoñ meñ apnī guuñj sun rahī huuñ maiñ

ki muddatoñ se ghar meñ muskurāhaTeñ na jal sakīñ

phir aaj chaar saal ba.ad usī jagah khaḌī huuñ maiñ

magar vo naam to kahīñ khude hue haiñ peḌ par

maiñ roz-o-shab kī āñdhiyoñ ko apne ghar meñ hī rahūñ

maiñ shaam ko udāsiyoñ meñ ik daraḳht ke tale

purāne naam chupke chupke yaad kar ke ro sakūñ

phir aaj chaar saal ba.ad usī jagah khaḌī huuñ maiñ

magar vo peḌ āñdhiyoñ meñ jaane kab ukhaḌ gayā

na-jāne kaun log is ko kaaT kar chale ga.e

mujhe nahīñ ḳhabar ki is kī patiyāñ kahāñ ga.iiñ

tane kī lakḌiyāñ bhī kis machine meñ badal ga.iiñ

vo naam pāniyoñ ke rāste kahāñ chale ga.e

phir aaj chaar saal ba.ad usī jagah khaḌī huuñ maiñ

maiñ lauT jā.ūñgī chabūtre kī gard pūñchh kar

guzartī sā.atoñ ke ġham-daroñ meñ chīḳh jā.eñge

udaas khiḌkiyoñ ke rañg dukh meñ bhiig jā.eñge

ye ḳhvāb bistaraoñ kī chādaroñ meñ suukh jā.eñge

maiñ taaza phuul jis tarah se ab sajā ke jā.ūñgī

vahī nuqūsh chaar saal ba.ad kaañp jā.eñge

maiñ ġhurbatoñ kī qabr meñ ḳhamosh lauT jā.ūñgī

ye umr be-kanār rāstoñ meñ biit jā.egī

maiñ ab ujaaḌ bastiyoñ meñ lauT ke na ā.ūñgī

phir aaj chaar sal baad usi jagah khaDi hun main

chabutre pe gard ki dabiz tah jami hui

guzarti saaton ke gham daron mein chiKHte hue

udas khiDkiyon ke rang dukh mein bhigte hue

ye KHwab bistaraon ki chadaron mein sukhte hue

wo phul ek bar jis tarah yahan sajae the

usi tarah se un ke zard naqsh kanpte hue

phir aaj chaar sal baad usi jagah khaDi hun main

hawa na-jaane kitni bar dar pe aa ke ja chuki

na-jaane kitni bar khiDkiyon pe dastaken huin

na-jaane kitne qahqahon ko log bhul bhi chuke

chabutre pe gard ki dabiz tah ne kah diya

ki muddaton se yan kisi ne dastan nahin likhi

phir aaj chaar sal baad usi jagah khaDi hun main

haweliyon ka tumtaraq TuT kar bikhar chuka

chaman se ab bahaar ka har ek nasha utar chuka

ananiyat shikast-KHurda KHamushi mein Dhal chuki

aur aaj gumbadon mein apni gunj sun rahi hun main

ki muddaton se ghar mein muskurahaTen na jal sakin

phir aaj chaar sal baad usi jagah khaDi hun main

magar wo nam to kahin khude hue hain peD par

main roz-o-shab ki aandhiyon ko apne ghar mein hi rahun

main sham ko udasiyon mein ek daraKHt ke tale

purane nam chupke chupke yaad kar ke ro sakun

phir aaj chaar sal baad usi jagah khaDi hun main

magar wo peD aandhiyon mein jaane kab ukhaD gaya

na-jaane kaun log is ko kaT kar chale gae

mujhe nahin KHabar ki is ki patiyan kahan gain

tane ki lakDiyan bhi kis machine mein badal gain

wo nam paniyon ke raste kahan chale gae

phir aaj chaar sal baad usi jagah khaDi hun main

main lauT jaungi chabutre ki gard punchh kar

guzarti saaton ke gham-daron mein chiKH jaenge

udas khiDkiyon ke rang dukh mein bhig jaenge

ye KHwab bistaraon ki chadaron mein sukh jaenge

main taza phul jis tarah se ab saja ke jaungi

wahi nuqush chaar sal baad kanp jaenge

main ghurbaton ki qabr mein KHamosh lauT jaungi

ye umr be-kanar raston mein bit jaegi

main ab ujaD bastiyon mein lauT ke na aaungi