chala aa raha hun samundaron ke visal se

chalā aa rahā huuñ samundaroñ ke visāl se

ka.ī lazzatoñ kā sitam liye

jo samundaroñ ke fusūñ meñ haiñ

mirā zehn hai vo sanam liye

vahī reg-zār hai sāmne

vahī reg-zār ki jis meñ ishq ke aa.ine

kisī dast-e-ġhaib se TuuT kar

rah-e-tār-e-jāñ meñ bikhar ga.e!

abhī aa rahā huuñ samundaroñ kī mahak liye

vo thapak liye jo samundaroñ kī nasīm meñ

hai hazār rañg se ḳhvāb-hā-e-ḳhunuk liye

chalā aa rahā huuñ samundaroñ kā namak liye

ye barahnagī-e-azīm terī dikhā.ūñ maiñ

(jo gadā-gadī kā bahāna hai)

koī rāh-rau ho to us se raah kī dāstāñ

maiñ sunūñ fasāna samundaroñ kā sunā.ūñ maiñ

(ki samundaroñ kā fasāna ishq kī gastarash kā fasāna hai)

ye barahnagī jise dekh kar baḌheñ dast o pā na khule zabāñ

na ḳhayāl hī meñ rahe tavāñ

to vo reg-zār ki jaise rah-zan-e-pīr ho

jise tab-e-rāh-zanī na ho

ki misāl-e-tā.er-e-nīm-jāñ

jise yād-e-bāl-o-parī na ho

kisī rāh-rau se umīd-e-rahm-o-karam liye

maiñ bharā huā huuñ samundaroñ ke jalāl se

chalā aa rahā huuñ maiñ sāhiloñ kā hasham liye

hai abhī inhī kī taraf mirā dar-e-dil khulā

ki nasīm-e-ḳhandā ko rah mile

mirī tīrgī ko nigah mile

vo surūr-o-soz-e-sadaf abhī mujhe yaad hai

abhī chāTtī hai samundaroñ kī zabāñ mujhe

mire paañv chhū ke nikal ga.ī koī mauj-e-sāz ba-kaf abhī

vo halāvateñ mire hast o buud meñ bhar ga.iiñ

vo jazīre jin ke ufuq hujūm-e-sahar se dīd-bahār the

vo parinde apnī talab meñ jo sar-e-kār the

vo parinde jin kī safīr meñ thiiñ risālateñ

abhī us safīr kī jalvateñ mire ḳhuuñ meñ haiñ

abhī zehn hai vo sanam liye

jo samundaroñ ke fusūñ meñ haiñ

chalā aa rahā huuñ samundaroñ ke jamāl se

sadaf o kanār kā ġham liye

chala aa raha hun samundaron ke visal se

kai lazzaton ka sitam liye

jo samundaron ke fusun mein hain

mera zehn hai wo sanam liye

wahi reg-zar hai samne

wahi reg-zar ki jis mein ishq ke aaine

kisi dast-e-ghaib se TuT kar

rah-e-tar-e-jaan mein bikhar gae!

abhi aa raha hun samundaron ki mahak liye

wo thapak liye jo samundaron ki nasim mein

hai hazar rang se KHwab-ha-e-KHunuk liye

chala aa raha hun samundaron ka namak liye

ye barahnagi-e-azim teri dikhaun main

(jo gada-gadi ka bahana hai)

koi rah-rau ho to us se rah ki dastan

main sunun fasana samundaron ka sunaun main

(ki samundaron ka fasana ishq ki gastarash ka fasana hai)

ye barahnagi jise dekh kar baDhen dast o pa na khule zaban

na KHayal hi mein rahe tawan

to wo reg-zar ki jaise rah-zan-e-pir ho

jise tab-e-rah-zani na ho

ki misal-e-taer-e-nim-jaan

jise yaad-e-baal-o-pari na ho

kisi rah-rau se umid-e-rahm-o-karam liye

main bhara hua hun samundaron ke jalal se

chala aa raha hun main sahilon ka hasham liye

hai abhi inhi ki taraf mera dar-e-dil khula

ki nasim-e-KHanda ko rah mile

meri tirgi ko nigah mile

wo surur-o-soz-e-sadaf abhi mujhe yaad hai

abhi chaTti hai samundaron ki zaban mujhe

mere panw chhu ke nikal gai koi mauj-e-saz ba-kaf abhi

wo halawaten mere hast o bud mein bhar gain

wo jazire jin ke ufuq hujum-e-sahar se did-bahaar the

wo parinde apni talab mein jo sar-e-kar the

wo parinde jin ki safir mein thin risalaten

abhi us safir ki jalwaten mere KHun mein hain

abhi zehn hai wo sanam liye

jo samundaron ke fusun mein hain

chala aa raha hun samundaron ke jamal se

sadaf o kanar ka gham liye