chalo chhoDo

chalo chhoḌo

mohabbat jhuuT hai

ahd-e-vafā ik shaġhl hai be-kār logoñ kā

talab sūkhe hue pattoñ kā be-raunaq jazīra hai

ḳhalish dīmak-zada aurāq par bosīda satroñ kā zaḳhīra hai

ḳhummār-e-vasl taptī dhuup ke siine pe uḌte bādaloñ kī rā.egāñ baḳhshish!

ġhubār-e-hijr-e-sahrā meñ sarāboñ se aTe mausam kā ḳhamyāza

chalo chhoḌo

ki ab tak maiñ añdheroñ kī dhamak meñ saañs kī zarboñ pe

chāhat kī binā rakh kar safar kartā rahā hūñgā

mujhe ehsās hī kab thā

ki tum bhī mausamoñ ke saath apne pairahan ke rañg badlogī

chalo chhoḌo

vo saare ḳhvāb kachchī bharbharī miTTī ke be-qīmat gharauñde the

vo saare zā.iqe merī zabāñ par zaḳhm ban kar jam ga.e hoñge

tumhārī uñgliyoñ kī naram poreñ pattharoñ par naam likhtī thiiñ mirā lekin

tumhārī uñgliyāñ to ādatan ye jurm kartī thiiñ

chalo chhoḌo

safar meñ ajnabī logoñ se aise hādse sarzad huā karte haiñ sadiyoñ se

chalo chhoḌo

mirā honā na honā ik barābar hai

tum apne ḳhāl-o-ḳhad ko ā.īne meñ phir nikharne do

tum apnī aañkh kī bastī meñ phir se ik nayā mausam utarne do

mire ḳhvāboñ ko marne do

na.ī tasvīr dekho

phir nayā maktūb likho

phir na.e mausam na.e lafzoñ se apnā silsila joḌo

mire maazī kī chāhat rā.egāñ samjho

mirī yādoñ se kachche rābte toḌo

chalo chhoḌo

mohabbat jhuuT hai

ahd-e-vafā ik shaġhl hai be-kār logoñ kā

chalo chhoDo

mohabbat jhuT hai

ahd-e-wafa ek shaghl hai be-kar logon ka

talab sukhe hue patton ka be-raunaq jazira hai

KHalish dimak-zada auraq par bosida satron ka zaKHira hai

KHummar-e-wasl tapti dhup ke sine pe uDte baadalon ki raegan baKHshish!

ghubar-e-hijr-e-sahra mein sarabon se aTe mausam ka KHamyaza

chalo chhoDo

ki ab tak main andheron ki dhamak mein sans ki zarbon pe

chahat ki bina rakh kar safar karta raha hunga

mujhe ehsas hi kab tha

ki tum bhi mausamon ke sath apne pairahan ke rang badlogi

chalo chhoDo

wo sare KHwab kachchi bharbhari miTTi ke be-qimat gharaunde the

wo sare zaiqe meri zaban par zaKHm ban kar jam gae honge

tumhaari ungliyon ki naram poren pattharon par nam likhti thin mera lekin

tumhaari ungliyan to aadatan ye jurm karti thin

chalo chhoDo

safar mein ajnabi logon se aise hadse sarzad hua karte hain sadiyon se

chalo chhoDo

mera hona na hona ek barabar hai

tum apne KHal-o-KHad ko aaine mein phir nikharne do

tum apni aankh ki basti mein phir se ek naya mausam utarne do

mere KHwabon ko marne do

nai taswir dekho

phir naya maktub likho

phir nae mausam nae lafzon se apna silsila joDo

mere mazi ki chahat raegan samjho

meri yaadon se kachche rabte toDo

chalo chhoDo

mohabbat jhuT hai

ahd-e-wafa ek shaghl hai be-kar logon ka