chaman mein humne dekhe hain

chaman meñ ham ne dekhe haiñ

bahut hī ḳhūbsūrat phuul

alag rañgat bhī hai un kī

judā ḳhushbū bhī hai un kī

havā chaltī hai jab bhī to

sabhī phūloñ ko aapas meñ

gale milte hī dekhā hai

sadā hañste hī dekhā hai

kabhī laḌte nahīñ dekhā

hamārā mulk bhī 'mīnā'

chaman ke hī to jaisā hai

sabhī maz.hab yahāñ par haiñ

zabāneñ bhī bahut sī haiñ

magar ham log laḌte haiñ

jalan aapas meñ rakhte haiñ

mohabbat kyuuñ nahīñ karte

chalo ab saarī nafrat ko

jalan ko aur adāvat ko

miTāne kī qasam khā.eñ

diloñ meñ prem dīpak phir

jalāne kī qasam khā.eñ

mohabbat aur uḳhuvvat ke

sharāfat ke sadāqat ke

sabaq sab ko sikhā.eñ ham

gale sab ko lagā.eñ ham

sabhī dharmoñ ke logo ko

sikhā.eñ kyā hai yak-jehtī

ye sapnā to hamārā hai

ye sab sākār ho jaa.e

hamārā pyaar jo dekhe

use bhī pyaar ho jaa.e

hamārī ab ye koshish ho

har insāñ ho saman jaisā

hamārī ab ye koshish ho

vatan bhī ho chaman jaisā

chaman mein hum ne dekhe hain

bahut hi KHubsurat phul

alag rangat bhi hai un ki

juda KHushbu bhi hai un ki

hawa chalti hai jab bhi to

sabhi phulon ko aapas mein

gale milte hi dekha hai

sada hanste hi dekha hai

kabhi laDte nahin dekha

hamara mulk bhi 'mina'

chaman ke hi to jaisa hai

sabhi mazhab yahan par hain

zabanen bhi bahut si hain

magar hum log laDte hain

jalan aapas mein rakhte hain

mohabbat kyun nahin karte

chalo ab sari nafrat ko

jalan ko aur adawat ko

miTane ki qasam khaen

dilon mein prem dipak phir

jalane ki qasam khaen

mohabbat aur uKHuwwat ke

sharafat ke sadaqat ke

sabaq sab ko sikhaen hum

gale sab ko lagaen hum

sabhi dharmon ke logo ko

sikhaen kya hai yak-jehti

ye sapna to hamara hai

ye sab sakar ho jae

hamara pyar jo dekhe

use bhi pyar ho jae

hamari ab ye koshish ho

har insan ho saman jaisa

hamari ab ye koshish ho

watan bhi ho chaman jaisa