chamche ki dua

lab pe aatī hai duā ban ke ye chāhat merī

zindagī qaab ke chamchoñ kī ho sūrat merī

kaalī daulat se mire ghar meñ ujālā kar de

aur ġharīboñ kī ġharībī ko do-bālā kar de

chaTpaTī baat mirī garm masāla ho jaa.e

ḳhvāh jantā kā mire dam se divālā ho jaa.e

zindagī ho mirī netāoñ kī sūrat yā-rab

ho faqat apnī ġharaz se hī mohabbat yā-rab

rahūñ āzād na ho qaid-e-maqāmī mālik

dil badalnā ho mirā shaġhl-e-davāmī mālik

chāplūsī ke hunar meñ mujhe yaktā kar de

jo bhī ho mere muqābil use paspā kar de

itnī tāsīr ḳhushāmad meñ atā kar maulā

ki hamesha rahe qabze meñ minister maulā

chaḌhte sūraj kā ho qismat meñ pujārī banñā

mujh ko manzūr nahīñ phir se bhikārī banñā

roġhan-e-qāz kī mālish kā salīqa aa jaa.e

daam meñ fāñste rahne kā tarīqa aa jaa.e

mire fitnoñ se har ik ghar ko ukhāḌā kar de

ġhair to ġhair haiñ apnoñ kā kabāḌā kar de

lekin allāh piTā.ī se bachānā mujh ko

juutā chappal na paḌe dahr meñ khānā mujh ko

lab pe aati hai dua ban ke ye chahat meri

zindagi qab ke chamchon ki ho surat meri

kali daulat se mere ghar mein ujala kar de

aur gharibon ki gharibi ko do-baala kar de

chaTpaTi baat meri garm masala ho jae

KHwah janta ka mere dam se diwala ho jae

zindagi ho meri netaon ki surat ya-rab

ho faqat apni gharaz se hi mohabbat ya-rab

rahun aazad na ho qaid-e-maqami malik

dil badalna ho mera shaghl-e-dawami malik

chaplusi ke hunar mein mujhe yakta kar de

jo bhi ho mere muqabil use paspa kar de

itni tasir KHushamad mein ata kar maula

ki hamesha rahe qabze mein minister maula

chaDhte suraj ka ho qismat mein pujari banna

mujh ko manzur nahin phir se bhikari banna

roghan-e-qaz ki malish ka saliqa aa jae

dam mein fanste rahne ka tariqa aa jae

mere fitnon se har ek ghar ko ukhaDa kar de

ghair to ghair hain apnon ka kabaDa kar de

lekin allah piTai se bachana mujh ko

juta chappal na paDe dahr mein khana mujh ko