charagh jab mera kamra napta hai

charāġh ne phuul ko janm denā shurūa kar diyā hai

duur bahut duur merā janm din rahtā hai

āñgan meñ dhuup na aa.e to samho

tum kisī ġhair-ābād ilāqe meñ rahte ho

miTTī meñ mere badan kī TūT-phūT paḌī hai

hamāre ḳhvāboñ meñ chaap kaun chhoḌ jaatā hai

raat ke sannāTe meñ TūTte hue charāġh

raat kī chādar pe phailtī huī sub.h

maiñ bikhrī patiyāñ uThātī huuñ

tum samundar ke dāman meñ

kisī bhī lahr ko utar jaane do

aur phir jab insānoñ kā sannāTā hotā hai

hameñ marne kī mohlat nahīñ dī jaatī

kyā ḳhvāhish kī miyān meñ

hamāre hausle rakhe hue hote haiñ

har vafādār lamha hameñ churā le jaatā hai

raat kā pahlā qadam hai

aur maiñ paidal huuñ

baisākhiyoñ kā chāñd banāne vaale

mere āñgan kī chhāñv luT chukī

merī āñkheñ mare hue bachche haiñ

aur phir merī TūT-phūT

samundar kī TuuT phuuT ho jaatī hai

maiñ qarīb se nikal jā.ūñ

koī samt-e-safar kī pahchān nahīñ kar saktī

shaam kī TuuTī muñDer se

hamāre talātum pe

aaj raat kī tartīb ho rahī hai

musāfir apne sañg-e-mīl kī hifāzat kartā hai

charāġh kamra nāptā hai

aur ġham mere dil se janm letā hī hai

zamīn hairat kartī hai

aur ek peḌ ugā detī hai

charagh ne phul ko janm dena shurua kar diya hai

dur bahut dur mera janm din rahta hai

aangan mein dhup na aae to samho

tum kisi ghair-abaad ilaqe mein rahte ho

miTTi mein mere badan ki TuT-phuT paDi hai

hamare KHwabon mein chap kaun chhoD jata hai

raat ke sannaTe mein TuTte hue charagh

raat ki chadar pe phailti hui subh

main bikhri patiyan uThati hun

tum samundar ke daman mein

kisi bhi lahr ko utar jaane do

aur phir jab insanon ka sannaTa hota hai

hamein marne ki mohlat nahin di jati

kya KHwahish ki miyan mein

hamare hausle rakhe hue hote hain

har wafadar lamha hamein chura le jata hai

raat ka pahla qadam hai

aur main paidal hun

baisakhiyon ka chand banane wale

mere aangan ki chhanw luT chuki

meri aankhen mare hue bachche hain

aur phir meri TuT-phuT

samundar ki TuT phuT ho jati hai

main qarib se nikal jaun

koi samt-e-safar ki pahchan nahin kar sakti

sham ki TuTi munDer se

hamare talatum pe

aaj raat ki tartib ho rahi hai

musafir apne sang-e-mil ki hifazat karta hai

charagh kamra napta hai

aur gham mere dil se janm leta hi hai

zamin hairat karti hai

aur ek peD uga deti hai