charagh ugne ke din nahin hain

zamāñ kī gardish

ḳhutūt jitne bhī amn-o-ulfat ke tum ne ham ko diye haiñ ab tak

zarā ruko to

hameñ batāo

tumhāre lafzoñ kī āstīnoñ meñ kyā chhupā hai

vo koh-e-kāfī qabīla jis ne

na.e zamānoñ ko surḳh chādar se Dhāñp lene kā

hukm sādir kiyā hai phir se

vo nochtā hai un ā.inoñ ko

ki jin pe sūraj kā aks chhalke to raushnī ho

ḳhudā ke ghar meñ

ḳharāb hāloñ ne dars dene kī Thaan lī hai

hamāre aañsū bhī kuchh ḳhasāroñ ko jazb kar ke

hazāroñ sajdoñ pe jam ga.e haiñ

har ik galī meñ hai shor itnā

azāneñ ghar tak pahuñch na paa.eñ

hamārī tahzīb aur rivāyat mirī paḌī hai

har ek gumbad pe sard lahje saje hue haiñ

hai darj un par

ye log saare jahannamī haiñ

hamāre bachche namāz paḌhne se Dar rahe haiñ

nigāheñ sab kī tamāsh-bīnoñ ne baañT lī haiñ

hirā se aatī huī havāoñ ko bosa dene kī aarzū meñ

bahut se rastoñ ne dhuul phūñkī

bahut se ghoḌoñ ne jaañ gañvā dī

zamāñ kī gardish

hai yaad ham ko

arab kī miTTī pe dhuup barsī to aag bhaḌkī

falak se utrī thiiñ ābshāreñ

bahut se fitne bhī jal bujhe the

vahī dhuāñ phir se uTh rahā hai

zamīñ pe jin ne baqā kā parcham uThā rakhā hai

sharīr bachche haiñ kūfiyoñ ke

zamāñ kī gardish

zarā suno to

bahut haiñ tūfāñ zamīñ hai banjar

mirī sadā ke nahīf sho.ale gavāh rahnā

gavāh rahnā

charāġh ugne ke din nahīñ haiñ charāġh ugne ke din nahīñ haiñ

zaman ki gardish

KHutut jitne bhi amn-o-ulfat ke tum ne hum ko diye hain ab tak

zara ruko to

hamein batao

tumhaare lafzon ki aastinon mein kya chhupa hai

wo koh-e-kafi qabila jis ne

nae zamanon ko surKH chadar se Dhanp lene ka

hukm sadir kiya hai phir se

wo nochta hai un aainon ko

ki jin pe suraj ka aks chhalke to raushni ho

KHuda ke ghar mein

KHarab haalon ne dars dene ki Than li hai

hamare aansu bhi kuchh KHasaron ko jazb kar ke

hazaron sajdon pe jam gae hain

har ek gali mein hai shor itna

azanen ghar tak pahunch na paen

hamari tahzib aur riwayat meri paDi hai

har ek gumbad pe sard lahje saje hue hain

hai darj un par

ye log sare jahannami hain

hamare bachche namaz paDhne se Dar rahe hain

nigahen sab ki tamash-binon ne banT li hain

hira se aati hui hawaon ko bosa dene ki aarzu mein

bahut se raston ne dhul phunki

bahut se ghoDon ne jaan ganwa di

zaman ki gardish

hai yaad hum ko

arab ki miTTi pe dhup barsi to aag bhaDki

falak se utri thin aabshaaren

bahut se fitne bhi jal bujhe the

wahi dhuan phir se uTh raha hai

zamin pe jin ne baqa ka parcham uTha rakha hai

sharir bachche hain kufiyon ke

zaman ki gardish

zara suno to

bahut hain tufan zamin hai banjar

meri sada ke nahif shoale gawah rahna

gawah rahna

charagh ugne ke din nahin hain charagh ugne ke din nahin hain