charlie-chaplin

'charlie-chaplin' ne kahā

use bārish meñ chalnā pasand hai

kyūñki tab koī us ke

aañsū nahīñ dekh paatā

us ne chaar shādiyāñ kiiñ

aur baara muāshiqe

aurteñ us par fidā thiiñ

vo unheñ kisī bhī vaqt

joy-ride de saktā thā

jab 'charlie' ke pairoñ meñ

phaTe hue juute huā karte the

ek aurat ne us kī mohabbat

mustarad kar dī thī

us ne bārish meñ chalnā shurūa kar diyā

koī us ke aañsū

nahīñ dekh pā rahā thā

use hañsī aa ga.ī

vo ye hañsī faroḳht karne lagā

us kī filmeñ dekh kar

vo log bahut hañste haiñ

jo āñsuoñ ko bārish se

alag nahīñ kar paate

jinhoñ ne chhup kar

nahīñ dekhā hotā apnī mahbūba ko

jab un ke pairoñ meñ juute

zaḳhmoñ kī tarah khule paḌe hote haiñ

vo jin ke paas

phaTe hue juute hote haiñ

un ke paas ek kahānī bhī hotī hai

'charlie-chaplin' ke paas bhī ek kahānī thī

jis ne ek bārish meñ use rulā diyā

ek roz use ilm huā

us aurat ko mare das saal ho ga.e

āsmān saaf thā

'charlie-chaplin' ne rone ke liye

kisī bārish kā intizār nahīñ kiyā

'charlie-chaplin' ne kaha

use barish mein chalna pasand hai

kyunki tab koi us ke

aansu nahin dekh pata

us ne chaar shadiyan kin

aur bara muashiqe

aurten us par fida thin

wo unhen kisi bhi waqt

joy-ride de sakta tha

jab 'charlie' ke pairon mein

phaTe hue jute hua karte the

ek aurat ne us ki mohabbat

mustarad kar di thi

us ne barish mein chalna shurua kar diya

koi us ke aansu

nahin dekh pa raha tha

use hansi aa gai

wo ye hansi faroKHt karne laga

us ki filmen dekh kar

wo log bahut hanste hain

jo aansuon ko barish se

alag nahin kar pate

jinhon ne chhup kar

nahin dekha hota apni mahbuba ko

jab un ke pairon mein jute

zaKHmon ki tarah khule paDe hote hain

wo jin ke pas

phaTe hue jute hote hain

un ke pas ek kahani bhi hoti hai

'charlie-chaplin' ke pas bhi ek kahani thi

jis ne ek barish mein use rula diya

ek roz use ilm hua

us aurat ko mare das sal ho gae

aasman saf tha

'charlie-chaplin' ne rone ke liye

kisi barish ka intizar nahin kiya