chashm-e-bad-dur

zamīñ par

paañv jab mohkam jamā.e

dastaras se āsmānoñ kī nikal aa.e

haqīqat

saaf thī

shaffāf thī

vo kulba-e-tārīk yuuñ pur-nūr hotā jā rahā thā

maiñ har ik vahm-o-gumāñ se duur hotā jā rahā thā

nāgahāñ goyā azān-e-fajr

kānoñ meñ paḌī

maiñ dauḌ kar

mandir kī sīḌhī par chaḌhā

Topī utārī

ḳhaak jhāḌī dvaar se

aur sehn ko ḳhālī kiyā har ḳhaar se

phir sajda-e-haq kā bajā laanā huā

siine ke andar qalb kā aanā huā

ik shankh gūñjā

maiñ haram kī samt lapkā

dāḳhle ke vaqt

māthe par tilak khīñchā

buland āvāz meñ

jai ho kā jab nā'ra lagāyā

āsmāñ ko ek malbe kī tarah bikhrā huā paayā

udhar shahnā.ī sī gūñjī

kisī kī maañg meñ sindūr

nanhā sā farishta

chashm-e-bad-dūr

zamin par

panw jab mohkam jamae

dastaras se aasmanon ki nikal aae

haqiqat

saf thi

shaffaf thi

wo kulba-e-tarik yun pur-nur hota ja raha tha

main har ek wahm-o-guman se dur hota ja raha tha

nagahan goya azan-e-fajr

kanon mein paDi

main dauD kar

mandir ki siDhi par chaDha

Topi utari

KHak jhaDi dwar se

aur sehn ko KHali kiya har KHar se

phir sajda-e-haq ka baja lana hua

sine ke andar qalb ka aana hua

ek shankh gunja

main haram ki samt lapka

daKHle ke waqt

mathe par tilak khincha

buland aawaz mein

jai ho ka jab na'ra lagaya

aasman ko ek malbe ki tarah bikhra hua paya

udhar shahnai si gunji

kisi ki mang mein sindur

nanha sa farishta

chashm-e-bad-dur