chashm-e-sawal!

haañ ai ġharīb laḌkī tū bhiik māñgtī hai

chashm-e-savāl terī kuchh kah ke jhuk ga.ī hai

tū bhiik māñgtī hai sharm-o-hayā kī maarī

aur sar se le ke pā tak hai kapkapī sī taarī

āñkhoñ meñ hai namī sī ā.īna sī jabīñ hai

tujh ko gadāgarī kī aadat abhī nahīñ hai

qismat meñ gesuoñ kī ā.īna hai na shāna

shāyad tirī nazar meñ tārīk hai zamāna

ye terā jism-e-nāzuk bosīda pairahan meñ

jaise gul-e-fasurda ujḌe hue chaman meñ

jhuk jaa.eñ tere aage shaitān kī nigāheñ

par khā rahī haiñ tujh ko insān kī nigāheñ

pākīzgī pe terī siitā ko pyaar aa.e

ma.asūmiyat pe tujh ko maryam gale lagā.e

hūreñ lapak ke chūmeñ, paa.eñ qadam jo tere

har naqsh-e-pā pe tere sajde kareñ farishte

ai kaash vo batā.e hai jis kī ye ḳhudā.ī

ye chashm-e-nargisī hai yā kāsa-e-gadā.ī!

lab haiñ ki pattharoñ ke TukḌe jame hue haiñ!

ruḳh haiñ ki rahguzar ke bujhte hue diye haiñ!

han ai gharib laDki tu bhik mangti hai

chashm-e-sawal teri kuchh kah ke jhuk gai hai

tu bhik mangti hai sharm-o-haya ki mari

aur sar se le ke pa tak hai kapkapi si tari

aankhon mein hai nami si aaina si jabin hai

tujh ko gadagari ki aadat abhi nahin hai

qismat mein gesuon ki aaina hai na shana

shayad teri nazar mein tarik hai zamana

ye tera jism-e-nazuk bosida pairahan mein

jaise gul-e-fasurda ujDe hue chaman mein

jhuk jaen tere aage shaitan ki nigahen

par kha rahi hain tujh ko insan ki nigahen

pakizgi pe teri sita ko pyar aae

masumiyat pe tujh ko maryam gale lagae

huren lapak ke chumen, paen qadam jo tere

har naqsh-e-pa pe tere sajde karen farishte

ai kash wo batae hai jis ki ye KHudai

ye chashm-e-nargisi hai ya kasa-e-gadai!

lab hain ki pattharon ke TukDe jame hue hain!

ruKH hain ki rahguzar ke bujhte hue diye hain!