chehra tera

sard rātoñ kā hasīñ ik ḳhvāb hai chehra tirā

kyā kahūñ bas manzar-e-nāyāb hai chehra tirā

nik.hat-e-gesū ko terī nik.hat-e-sumbul likhūñ

tere narm-o-nāzuk in hoñToñ ko barg-e-gul likhūñ

aarzū par ye araq lagtā hai shabnam kī tarah

aur sanī is meñ laTeñ lagtī hai resham kī tarah

jaise koī gulshan-e-shādāb hai chehra tirā

kyā kahūñ bas manzar-e-nāyāb hai chehra tirā

nuur se kuchh is tarah hai chashm terī tar-ba-tar

chāñdnī kā aks joñ utrā ho sat.h-e-āb par

putliyāñ donoñ tirī āñkhoñ meñ do nīlam lage

aur tirī āñkhoñ kā paanī mujh ko jām-e-jam lage

vaqt-e-sub.h ye ālam-e-sīmāb hai chehra tirā

kyā kahūñ bas manzar-e-nāyāb hai chehra tirā

qaul har niklā zabāñ se jo tirī shahdāb hai

aur laboñ kā til kitāb-e-ishq kā ik baab hai

hai musavvir kī tire añg añg meñ gul-kāriyāñ

mo.ajiza lagtī hai tere husn kī rañgīniyāñ

gauhar-e-nāyāb hai zartāb hai chehra tirā

kyā kahūñ bas manzar-e-nāyāb hai chehra tirā

sard raaton ka hasin ek KHwab hai chehra tera

kya kahun bas manzar-e-nayab hai chehra tera

nikhat-e-gesu ko teri nikhat-e-sumbul likhun

tere narm-o-nazuk in honTon ko barg-e-gul likhun

aarzu par ye araq lagta hai shabnam ki tarah

aur sani is mein laTen lagti hai resham ki tarah

jaise koi gulshan-e-shadab hai chehra tera

kya kahun bas manzar-e-nayab hai chehra tera

nur se kuchh is tarah hai chashm teri tar-ba-tar

chandni ka aks jon utra ho sath-e-ab par

putliyan donon teri aankhon mein do nilam lage

aur teri aankhon ka pani mujh ko jam-e-jam lage

waqt-e-subh ye aalam-e-simab hai chehra tera

kya kahun bas manzar-e-nayab hai chehra tera

qaul har nikla zaban se jo teri shahdab hai

aur labon ka til kitab-e-ishq ka ek bab hai

hai musawwir ki tere ang ang mein gul-kariyan

moajiza lagti hai tere husn ki ranginiyan

gauhar-e-nayab hai zartab hai chehra tera

kya kahun bas manzar-e-nayab hai chehra tera