chhabbis january

aaj phir hai hameñ ḳhushī ai dost

aa.ī chhabbīs january ai dost

ya.anī tārīḳh vo ki jab bhārat

pā gayā apnī gum-shuda daulat

ham zamāne meñ bāryāb hue

apne maqsad meñ kāmyāb hue

āḳhir ham ne badal liiñ taqdīreñ

toḌ kar bandagī kī zanjīreñ

apnī koshish se bahra-mand hue

saarī duniyā meñ sar-buland hue

ḳhush hue shaad kahe jaane lage

ham bhī āzād kahe jaane lage

mulk meñ aayā daur-e-jamhūrī

ho ga.ī duur saarī majbūrī

jo na kar paa.e aaj karne lage

ham hī mil-jul ke raaj karne lage

kahūñ kyā apne rahbaroñ kī baat

din ko din samjhe vo na raat ko raat

jo bhī kar sakte the vo kar ke rahe

kyoñ muqaddar na phir sañvar ke rahe

ham ko āzādī aaj hai hāsil

ab hai ham sab pe farz ai 'ādil'

us kī azmat sadā rahe malhūz

har tarah ham rakheñ ise mahfūz

is pe koī bhī aañch aane na paa.e

jaan jaa.e magar ye jaane na paa.e

aaj phir hai hamein KHushi ai dost

aai chhabbis january ai dost

yani tariKH wo ki jab bhaarat

pa gaya apni gum-shuda daulat

hum zamane mein baryab hue

apne maqsad mein kaamyab hue

aaKHir hum ne badal lin taqdiren

toD kar bandagi ki zanjiren

apni koshish se bahra-mand hue

sari duniya mein sar-buland hue

KHush hue shad kahe jaane lage

hum bhi aazad kahe jaane lage

mulk mein aaya daur-e-jamhuri

ho gai dur sari majburi

jo na kar pae aaj karne lage

hum hi mil-jul ke raj karne lage

kahun kya apne rahbaron ki baat

din ko din samjhe wo na raat ko raat

jo bhi kar sakte the wo kar ke rahe

kyon muqaddar na phir sanwar ke rahe

hum ko aazadi aaj hai hasil

ab hai hum sab pe farz ai 'adil'

us ki azmat sada rahe malhuz

har tarah hum rakhen ise mahfuz

is pe koi bhi aanch aane na pae

jaan jae magar ye jaane na pae