chhoTe baDe

chhoTā sā ek biij agar hai to kyā huā

kitnā baḌā daraḳht hai is meñ chhupā huā

dhartī meñ Daal detā hai jab vaqt par kisān

phir dekhne kī hotī hai is biij kī uThān

sansār jī rahā hai isī kām-kāj se

kitnoñ ke peT bharte haiñ is ke anaaj se

chhoTe se til meñ aañkh ke itnī baḌā.ī hai

dariyā hoñ yā pahāḌ hoñ sab kī samā.ī hai

phūloñ kā aur chāñd sitāroñ kā rang ruup

do āñkheñ dekhtī haiñ hazāroñ kā rang ruup

phailā hai saare ghar meñ ujālā charāġh ek

gun kitne haiñ dimāġh meñ aur hai dimāġh ek

mil-jul ke ek paanī kā dariyā bahātī haiñ

būñdeñ haiñ chhoTī chhoTī jo sāgar banātī haiñ

ye mez par tumhārī jo chhoTī sī hai kitāb

chhoTī sī is kitāb meñ lākhoñ kā hai hisāb

chhoTā sā dil hai is meñ umangeñ baḌī baḌī

dil aur baḌh gayā koī mushkil jo aa paḌī

chhoTī sī umr meñ jo irāde rahe kaḌe

duniyā meñ tum bhī kaam karoge baḌe baḌe

chhoTa sa ek bij agar hai to kya hua

kitna baDa daraKHt hai is mein chhupa hua

dharti mein Dal deta hai jab waqt par kisan

phir dekhne ki hoti hai is bij ki uThan

sansar ji raha hai isi kaam-kaj se

kitnon ke peT bharte hain is ke anaj se

chhoTe se til mein aankh ke itni baDai hai

dariya hon ya pahaD hon sab ki samai hai

phulon ka aur chand sitaron ka rang rup

do aankhen dekhti hain hazaron ka rang rup

phaila hai sare ghar mein ujala charagh ek

gun kitne hain dimagh mein aur hai dimagh ek

mil-jul ke ek pani ka dariya bahati hain

bunden hain chhoTi chhoTi jo sagar banati hain

ye mez par tumhaari jo chhoTi si hai kitab

chhoTi si is kitab mein lakhon ka hai hisab

chhoTa sa dil hai is mein umangen baDi baDi

dil aur baDh gaya koi mushkil jo aa paDi

chhoTi si umr mein jo irade rahe kaDe

duniya mein tum bhi kaam karoge baDe baDe