chhoTe kaam ka baDa natija

ek bachcha ki abhī kuchh use tam.īz na thī

lahv-bāzī se pasandīda koī chiiz na thī

khelnā kūdnā khānā yahī ma.amūl thā bas

inhīñ tiflāna tamannāoñ meñ mashġhūl thā bas

ek tālāb thā do-chār qadam ghar se pare

dil meñ lahr aa.ī lab-e-āb zarā sair kare

saaf paanī se jo tālāb ko paayā labrez

khel kā shauq tabī.at meñ huā aur bhī tez

ās-pās apne jo paayā koī kañkar patthar

pheñk maarā use paanī meñ bahut ḳhush ho kar

khel thā pahle to ab turfa-tamāshā dekhā

dil hī dil meñ mutahayyar thā ki ye kyā dekhā

dā.era ek banā aisā ki baḌhtā hai muhīt

gher lī jis ne ki tālāb kī sab sat.h-e-basīt

phir to khel us kā isī shaġhl pe mauqūf rahā

isī nazzāre meñ tā-der vo masrūf rahā

isī asnā meñ huā bachche kī maañ kā bhī guzar

bolā ammāñ mujhe aa.ī hai ajab chiiz nazar

jo na dekhī na sunī thī kabhī ab se pahle

shāyad aa.ī hai nazar mujh ko hī sab se pahle

ik zarā sī harakat aur ye tāsīr ajiib

dā.era baḌh ke pahuñchtā hai kināre ke qarīb

bas-ki jī jaan se is shobade par thā shaidā

vus.at-e-dā.era kī apnī amal se paidā

thī vo maañ ahl-e-dil aur nek-manush nek-nihād

hañs ke farmāyā mirī jaañ ye nasīhat rakh yaad

yūñhī har kaam kā ho jaatā hai anjām baḌā

go ki āġhāz meñ hotā nahīñ vo kaam baḌā

kabhī adnā harakat zalzala ban jaatī hai

kabhī nāchīz sī ik baat ġhazab Dhātī hai

yahī andāz-e-nikokārī o bad-kārī hai

avvalan ḳhaas thī ab aam meñ vo jaarī hai

ek bachcha ki abhi kuchh use tamiz na thi

lahw-bazi se pasandida koi chiz na thi

khelna kudna khana yahi mamul tha bas

inhin tiflana tamannaon mein mashghul tha bas

ek talab tha do-chaar qadam ghar se pare

dil mein lahr aai lab-e-ab zara sair kare

saf pani se jo talab ko paya labrez

khel ka shauq tabiat mein hua aur bhi tez

aas-pas apne jo paya koi kankar patthar

phenk mara use pani mein bahut KHush ho kar

khel tha pahle to ab turfa-tamasha dekha

dil hi dil mein mutahayyar tha ki ye kya dekha

daera ek bana aisa ki baDhta hai muhit

gher li jis ne ki talab ki sab sath-e-basit

phir to khel us ka isi shaghl pe mauquf raha

isi nazzare mein ta-der wo masruf raha

isi asna mein hua bachche ki man ka bhi guzar

bola amman mujhe aai hai ajab chiz nazar

jo na dekhi na suni thi kabhi ab se pahle

shayad aai hai nazar mujh ko hi sab se pahle

ek zara si harakat aur ye tasir ajib

daera baDh ke pahunchta hai kinare ke qarib

bas-ki ji jaan se is shobade par tha shaida

wusat-e-daera ki apni amal se paida

thi wo man ahl-e-dil aur nek-manush nek-nihad

hans ke farmaya meri jaan ye nasihat rakh yaad

yunhi har kaam ka ho jata hai anjam baDa

go ki aaghaz mein hota nahin wo kaam baDa

kabhi adna harakat zalzala ban jati hai

kabhi nachiz si ek baat ghazab Dhati hai

yahi andaz-e-nikokari o bad-kari hai

awwalan KHas thi ab aam mein wo jari hai