chhoTi si khiDki

muḳhtasar kamre kī

ek chhoTī sī maġhmūm khiḌkī

kabhī dekhtī hai jo bāhar kī duniyā

udāsī bahut baḌh jaatī hai us kī

magar sāmne ke hare lawn ke phuul

champā chamelī gulāb aur belā kī poshāk

pahne hue muskurāte hue

rañg o ḳhushbū ke lahje meñ us ko

sunāte haiñ ma.asūm lamhoñ kā qissa

hathelī pe phir inhī ma.asūm lamhoñ kī

tahrīr kartī hai dilkash hañsī

ek chahkār koyal kī

aur jab mohabbat kī uñglī nazākat se thāme

ḳhirāmāñ ḳhirāmāñ

anokhā sā ik phuul is lawn par

'mīr' ke sher ki pañkhuḌī chunane lagtā hai

tab vaqt ke qahqahoñ kā

bahut ḳhushnumā silsila

Thahar jaatā hai

is muḳhtasar kamre kī

chhoTī sī khiḌkī meñ

muKHtasar kamre ki

ek chhoTi si maghmum khiDki

kabhi dekhti hai jo bahar ki duniya

udasi bahut baDh jati hai us ki

magar samne ke hare lawn ke phul

champa chameli gulab aur bela ki poshak

pahne hue muskuraate hue

rang o KHushbu ke lahje mein us ko

sunate hain masum lamhon ka qissa

hatheli pe phir inhi masum lamhon ki

tahrir karti hai dilkash hansi

ek chahkar koyal ki

aur jab mohabbat ki ungli nazakat se thame

KHiraman KHiraman

anokha sa ek phul is lawn par

'mir' ke sher ki pankhuDi chunane lagta hai

tab waqt ke qahqahon ka

bahut KHushnuma silsila

Thahar jata hai

is muKHtasar kamre ki

chhoTi si khiDki mein