chiDiya ke bachche

do tiin chhoTe bachche chiḌiyā ke ghoñsle meñ

chup-chāp lag rahe haiñ siine se apnī maañ ke

chiḌiyā ne māmtā se phailā ke donoñ baazū

apne paroñ ke andar bachchoñ ko Dhak liyā hai

is tarah roz-marra kartī hai maañ hifāzat

sardī se aur havā se rakhtī hai garm un ko

lekin chiḌā gayā hai chuggā talāsh karne

daana kahīñ kahīñ se puuTe meñ apne bhar kar

jab lā.egā to bachche muñh khol deñge jhaT-paT

un ko bharā.egā vo maañ aur baap donoñ

bachchoñ kī parvarish meñ masrūf haiñ barābar

aur chhoTe bachche ḳhush haiñ taklīf kuchh nahīñ hai

ai chhoTe chhoTe bachcho tum ūñche ghoñsle se

hargiz nahīñ giroge par aur purze ab tak

nikle nahīñ tumhāre, is vāste abhī tum

ūñche na uḌ sakoge, haañ jab tumhāre baazū

aur par durust hoñge to din kī raushnī meñ

sīkhoge tum bhī uḌnā karte phiroge cheñ-cheñ

uḌte phiroge phur-phur ai chhoTe bachcho lekin

kavvā burī balā hai us se ḳhudā bachā.e

do tin chhoTe bachche chiDiya ke ghonsle mein

chup-chap lag rahe hain sine se apni man ke

chiDiya ne mamta se phaila ke donon bazu

apne paron ke andar bachchon ko Dhak liya hai

is tarah roz-marra karti hai man hifazat

sardi se aur hawa se rakhti hai garm un ko

lekin chiDa gaya hai chugga talash karne

dana kahin kahin se puTe mein apne bhar kar

jab laega to bachche munh khol denge jhaT-paT

un ko bharaega wo man aur bap donon

bachchon ki parwarish mein masruf hain barabar

aur chhoTe bachche KHush hain taklif kuchh nahin hai

ai chhoTe chhoTe bachcho tum unche ghonsle se

hargiz nahin giroge par aur purze ab tak

nikle nahin tumhaare, is waste abhi tum

unche na uD sakoge, han jab tumhaare bazu

aur par durust honge to din ki raushni mein

sikhoge tum bhi uDna karte phiroge chen-chen

uDte phiroge phur-phur ai chhoTe bachcho lekin

kawwa buri bala hai us se KHuda bachae