chiDiyon ki shikayat

chiḌiyoñ ne be-tarah satāyā hai

mere kamre ko ghar banāyā hai

chhat pe un ko jahāñ milī hai jagah

ik na ik ghoñsla banāyā hai

ain mere palañg ke uupar

hai jo hissa vo un ko bhāyā hai

taar bijlī kā hai jo chhat pe lagā

vo to mīrās hī meñ paayā hai

koī khūñTī ho taaq ho dar ho

un kī jāgīr meñ vo aayā hai

sar pe bīToñ kā meñh barastā hai

be-Dhab aisā ye abr chhāyā hai

takiya par mez par kitāboñ par

mohr kā sā nishāñ banāyā hai

hissa mujh ko bhī kuchh milā hai zarūr

jab chiḌā tinke le kar aayā hai

un kī chuuñ chuuñ kā raag sun kar dil

gaanā sunñe se tañg aayā hai

sab ke sar par ḳhudā kā hai saaya

mujh pe un ke paroñ kā saaya hai

is qadar biiT kartī haiñ kam-baḳht

naak meñ dam har ek kā aayā hai

sub.h se laḌ rahī haiñ aapas meñ

sar pe saarā makān uThāyā hai

paḌh nahīñ saktā likh nahīñ saktā

is qadar shor-o-ġhul machāyā hai

aisā mālūm hotā hai goyā

merā kamra nahīñ parāyā hai

chiDiyon ne be-tarah sataya hai

mere kamre ko ghar banaya hai

chhat pe un ko jahan mili hai jagah

ek na ek ghonsla banaya hai

ain mere palang ke upar

hai jo hissa wo un ko bhaya hai

tar bijli ka hai jo chhat pe laga

wo to miras hi mein paya hai

koi khunTi ho taq ho dar ho

un ki jagir mein wo aaya hai

sar pe biTon ka meinh barasta hai

be-Dhab aisa ye abr chhaya hai

takiya par mez par kitabon par

mohr ka sa nishan banaya hai

hissa mujh ko bhi kuchh mila hai zarur

jab chiDa tinke le kar aaya hai

un ki chun chun ka rag sun kar dil

gana sunne se tang aaya hai

sab ke sar par KHuda ka hai saya

mujh pe un ke paron ka saya hai

is qadar biT karti hain kam-baKHt

nak mein dam har ek ka aaya hai

subh se laD rahi hain aapas mein

sar pe sara makan uThaya hai

paDh nahin sakta likh nahin sakta

is qadar shor-o-ghul machaya hai

aisa malum hota hai goya

mera kamra nahin paraya hai