chup

tū ne sard havāoñ kī zabāñ sīkhī hai

tere ThanDe lams se dhaḌkaneñ yaḳh-basta huiiñ aur maiñ chup huuñ

maiñ ne vaqt-e-sub.h chiḌiyoñ kī surīlī chahchahāhaT ko sunā hai

aur mere zehn ke sāgar meñ naġhme bulbule ban kar uThe haiñ

tere kaḌve bol se har-sū haiñ āvāzoñ ke lāshe

aur maiñ chup huuñ

maiñ ne vo māsūm pyāre gul-badan dekhe haiñ

jin ke marmarīñ jismoñ meñ pākīza mohabbat ke nasheman haiñ

tire in khurdure hāthoñ ne ye saare nasheman noch Daale

aur maiñ chup huuñ

maiñ ne dekhe haiñ vo chehre chāñd jaise ġhuncha-sūrat

jin kī āñkheñ aa.ina haiñ aane vaale mausamoñ kā

tū ne un āñkhoñ meñ bhī kāñTe chubho.e

aur maiñ chup huuñ

bā-kamāl o bā-safā vo log bhī dekhe haiñ maiñ ne

jin ke hoñToñ se khile haiñ sidq o dānā.ī ke phuul

tū ne un hoñToñ ko gholā zahr meñ

aur maiñ chup huuñ

tu ne sard hawaon ki zaban sikhi hai

tere ThanDe lams se dhaDkanen yaKH-basta huin aur main chup hun

main ne waqt-e-subh chiDiyon ki surili chahchahahaT ko suna hai

aur mere zehn ke sagar mein naghme bulbule ban kar uThe hain

tere kaDwe bol se har-su hain aawazon ke lashe

aur main chup hun

main ne wo masum pyare gul-badan dekhe hain

jin ke marmarin jismon mein pakiza mohabbat ke nasheman hain

tere in khurdure hathon ne ye sare nasheman noch Dale

aur main chup hun

main ne dekhe hain wo chehre chand jaise ghuncha-surat

jin ki aankhen aaina hain aane wale mausamon ka

tu ne un aankhon mein bhi kanTe chubhoe

aur main chup hun

ba-kamal o ba-safa wo log bhi dekhe hain main ne

jin ke honTon se khile hain sidq o danai ke phul

tu ne un honTon ko ghola zahr mein

aur main chup hun