cigarette aur pan ka mukalima

cigarette ne ye ik paan ke biiḌe se kahā

tū hamesha se parī-rūoñ ke jhurmuT meñ rahā

kaun sī aisī haiñ ḳhidmāt tirī besh-bahā

ḳhūñ-bahā kyuuñ lab-o-dandān-e-hasīnāñ se liyā

tujh meñ kyā la.al lage haiñ ki tū itrātā hai

be-hijābāna har ik bazm meñ aa jaatā hai

cigarette se jo sune paan ne ye talḳh suḳhan

bolā ḳhāmosh ki achchhā nahīñ hāsid kā chalan

jalte rahne se dhuāñ ban ke miTā terā badan

tū lagā muñh ko to ġhā.eb huī ḳhushbū-e-dahan

kāġhzī pairahan aur us pe tū fariyādī hai

ḳhud-ba-ḳhud ġhussa meñ jal jaane kā tū aadī hai

is pe cigarette ne kahā paan se ye kyā hai sitam

chhāñv meñ paltā hai aur tū hai baḌā sabz qadam

katthe, chūne pe, Dalī par tirā qaa.em hai bharam

tujh pe chāñdī ke varaq lipTeñ to kyā hai tujhe ġham

ḳhās-dānoñ ke muhāfoñ meñ safar kartā hai

raat din māh-jabīnoñ meñ basar kartā hai

paan bolā ki jalātā hai tū kyuuñ qalb-o-jigar

eshiyā.ī maiñ huuñ, maġhrib kā hai tū saudāgar

kaash tū apne garebān meñ muñh Daale agar

tū vo be-bas hai ki māchis kā jo ho dast-e-nigar

aag barsāne meñ saarī tirī ra.anā.ī hai

aur ye chiñgārī bhī bāhar se kahīñ paa.ī hai

bolā cigarette ki bashar shikva-kunāñ haiñ tere

dar-o-dīvār pe paīkoñ ke nishāñ haiñ tere

jo lipstick meñ haiñ vo jalve kahāñ haiñ tere

ḳhud to halkā hai pa nuqsān girāñ haiñ tere

na ġhizā meñ na davā meñ hai to phir kaun hai tū

tū halākū hai ki taimūr ki fir.aun hai tū

paan kahne lagā cigarette se ki iblīs-e-laīñ

terī tambākū se jaatī hai badan meñ nicotine

tujh se paidā hue amrāz nihāyat sañgīn

be-tamīz itnā ki mahfil meñ jalā.e qālīn

raakh se terī bharī dekhte haiñ ashtray

koī girne ko to gir jaa.e par itnā na gire

jal ke ḳhud sab ko jilā denā tirā pesha hai

chhup ke baiThī hai ajal jis meñ tū vo besha hai

jaan le apne hī āshiq kī jo vo tesha hai

tere piine se to sartān kā andesha hai

jo tujhe muñh se lagā.eñge lahū thūkeñge

aur bhī chīzoñ ke kash lene se kab chūkeñge

sulh in donoñ kī āḳhir meñ karā.ī maiñ ne

paan meñ Daal ke tambākū bhī khaa.ī maiñ ne

lab se cigarette ke jo chiñgārī uḌaa.ī maiñ ne

sher aur fikr kī sham.a us se jalā.ī maiñ ne

paan se maiñ ne kahā shaan tirī baalā hai

tū hai nausha to ye cigarette tirā shahbālā hai

cigarette ne ye ek pan ke biDe se kaha

tu hamesha se pari-ruon ke jhurmuT mein raha

kaun si aisi hain KHidmat teri besh-baha

KHun-baha kyun lab-o-dandan-e-hasinan se liya

tujh mein kya lal lage hain ki tu itraata hai

be-hijabana har ek bazm mein aa jata hai

cigarette se jo sune pan ne ye talKH suKHan

bola KHamosh ki achchha nahin hasid ka chalan

jalte rahne se dhuan ban ke miTa tera badan

tu laga munh ko to ghaeb hui KHushbu-e-dahan

kaghzi pairahan aur us pe tu fariyaadi hai

KHud-ba-KHud ghussa mein jal jaane ka tu aadi hai

is pe cigarette ne kaha pan se ye kya hai sitam

chhanw mein palta hai aur tu hai baDa sabz qadam

katthe, chune pe, Dali par tera qaem hai bharam

tujh pe chandi ke waraq lipTen to kya hai tujhe gham

KHas-danon ke muhafon mein safar karta hai

raat din mah-jabinon mein basar karta hai

pan bola ki jalata hai tu kyun qalb-o-jigar

eshiyai main hun, maghrib ka hai tu saudagar

kash tu apne gareban mein munh Dale agar

tu wo be-bas hai ki machis ka jo ho dast-e-nigar

aag barsane mein sari teri ranai hai

aur ye chingari bhi bahar se kahin pai hai

bola cigarette ki bashar shikwa-kunan hain tere

dar-o-diwar pe paikon ke nishan hain tere

jo lipstick mein hain wo jalwe kahan hain tere

KHud to halka hai pa nuqsan giran hain tere

na ghiza mein na dawa mein hai to phir kaun hai tu

tu halaku hai ki taimur ki firaun hai tu

pan kahne laga cigarette se ki iblis-e-lain

teri tambaku se jati hai badan mein nicotine

tujh se paida hue amraaz nihayat sangin

be-tamiz itna ki mahfil mein jalae qalin

rakh se teri bhari dekhte hain ashtray

koi girne ko to gir jae par itna na gire

jal ke KHud sab ko jila dena tera pesha hai

chhup ke baiThi hai ajal jis mein tu wo besha hai

jaan le apne hi aashiq ki jo wo tesha hai

tere pine se to sartan ka andesha hai

jo tujhe munh se lagaenge lahu thukenge

aur bhi chizon ke kash lene se kab chukenge

sulh in donon ki aaKHir mein karai main ne

pan mein Dal ke tambaku bhi khai main ne

lab se cigarette ke jo chingari uDai main ne

sher aur fikr ki shama us se jalai main ne

pan se main ne kaha shan teri baala hai

tu hai nausha to ye cigarette tera shahbaala hai