clerk

ḳhāliq ne jab azal maiñ banāyā clerk ko

lauh o qalam kā jalva dikhāyā clerk ko

kursī pe phir uThāyā biThāyā clerk ko

afsar ke saath pin se lagāyā clerk ko

miTī gad.he kī Daal kar us kī sarisht meñ

dāḳhil mashaqqatoñ ko kiyā sarnavisht meñ

chaprāsī saath ḳhuld meñ jab le gayā use

hūroñ ne kuchh mazāq kiye kuchh malak hañse

hātif kī daf.atan ye sadā aa.ī ġhaib se

''dekho ise jo dīda-e-ibrat-nigāh hai''

aadam kā rough-draft hai kab tak hañsoge tum

approve ho kar aayā to sajda karoge tum

jannat meñ fileñ haiñ na hai koī Diary

hūreñ to jāntī haiñ faqat tarz-e-dilbarī

ġhilmāñ se kuchh kaho to sunā.e kharī kharī

ye intizām hai ye discipline hai daftarī

maiñ sochtā huuñ kyā karūñ aisī bahisht ko

''TeḌhā lagā hai qat qalam-e-sarnavisht ko''

ḳhuld-e-barīñ ko naaz thā apne makīn par

aur ye bhī the miTe hue ik hūr-e-īn par

lālach kī mohr kanda thī dil ke nagīn par

T-A vasūl karne ko utrā zamīn par

iblīs rāste meñ milā kuchh sikhā diyā

utrā falak se third meñ inter likhā diyā

rakkhā qadam clerk ne jis dam zamīn par

dekhā har ek chiiz hai qudrat ke diin par

bolā ki maiñ to zinda rahūñgā routine par

mujh par machine hogī maiñ hūñgā machine par

is āhanī sanam kī ibādat hai mujh pe farz

naukar huuñ bādshāh kā jiitā huuñ le ke qarz

ai secretariat kī imārat zarā batā

us vaqt jabki jaate haiñ afsar bhī baukhlā

hotā hai kaun kashtī-e-file kā nāḳhudā

afsar nahīñ haiñ is kī haqīqat se āshnā

par ham ye jānte haiñ ki insān haiñ clerk

dariyā-e-red-tape kā tūfān haiñ clerk

KHaliq ne jab azal main banaya clerk ko

lauh o qalam ka jalwa dikhaya clerk ko

kursi pe phir uThaya biThaya clerk ko

afsar ke sath pin se lagaya clerk ko

miTi gadhe ki Dal kar us ki sarisht mein

daKHil mashaqqaton ko kiya sarnawisht mein

chaprasi sath KHuld mein jab le gaya use

huron ne kuchh mazaq kiye kuchh malak hanse

hatif ki dafatan ye sada aai ghaib se

dekho ise jo dida-e-ibrat-nigah hai

aadam ka rough-draft hai kab tak hansoge tum

approwe ho kar aaya to sajda karoge tum

jannat mein filen hain na hai koi Diary

huren to jaanti hain faqat tarz-e-dilbari

ghilman se kuchh kaho to sunae khari khari

ye intizam hai ye discipline hai daftari

main sochta hun kya karun aisi bahisht ko

TeDha laga hai qat qalam-e-sarnawisht ko

KHuld-e-barin ko naz tha apne makin par

aur ye bhi the miTe hue ek hur-e-in par

lalach ki mohr kanda thi dil ke nagin par

T-A wasul karne ko utra zamin par

iblis raste mein mila kuchh sikha diya

utra falak se third mein inter likha diya

rakkha qadam clerk ne jis dam zamin par

dekha har ek chiz hai qudrat ke din par

bola ki main to zinda rahunga routine par

mujh par machine hogi main hunga machine par

is aahani sanam ki ibaadat hai mujh pe farz

naukar hun baadshah ka jita hun le ke qarz

ai secretariat ki imarat zara bata

us waqt jabki jate hain afsar bhi baukhla

hota hai kaun kashti-e-file ka naKHuda

afsar nahin hain is ki haqiqat se aashna

par hum ye jaante hain ki insan hain clerk

dariya-e-red-tape ka tufan hain clerk