dadi amman

daadī ammāñ hameñ sunāo ab ik na.ī kahānī

jis meñ zālim raaja na ho na hī zālim raanī

jis meñ bhuut pret dev aur jinnātoñ kī baat na ho

jis meñ shahzādī kī ḳhātir shahzāde kī maat na ho

jis meñ koī lobhī luTerā saat samundar se na aa.e

jis meñ sone kī chiḌiyā ke pañkhoñ ko nochā na jaa.e

aaj ke yug meñ in qissoñ kī baat huī purānī

daadī ammāñ hameñ sunāo ab ik na.ī kahānī

na.ī kahānī jis meñ dahqāñ jhuum rahe hoñ khetoñ meñ

na.ī kahānī jis meñ koyal magan ho sukh ke gītoñ meñ

na.ī kahānī jis meñ dhartī ugal rahī ho sonā

amn-o-mohabbat ke gītoñ se guuñj rahā ho har konā

na.ī kahānī jis meñ ham chandā maamā tak jaa.eñ

aur chandā-nagrī se jhūlā jhuul ke vāpas aa.eñ

na.ī kahānī kitnī sundar kitnī bhalī suhānī

daadī ammāñ hameñ sunāo ab ik na.ī kahānī

dadi amman hamein sunao ab ek nai kahani

jis mein zalim raja na ho na hi zalim rani

jis mein bhut pret dew aur jinnaton ki baat na ho

jis mein shahzadi ki KHatir shahzade ki mat na ho

jis mein koi lobhi luTera sat samundar se na aae

jis mein sone ki chiDiya ke pankhon ko nocha na jae

aaj ke yug mein in qisson ki baat hui purani

dadi amman hamein sunao ab ek nai kahani

nai kahani jis mein dahqan jhum rahe hon kheton mein

nai kahani jis mein koyal magan ho sukh ke giton mein

nai kahani jis mein dharti ugal rahi ho sona

amn-o-mohabbat ke giton se gunj raha ho har kona

nai kahani jis mein hum chanda mama tak jaen

aur chanda-nagri se jhula jhul ke wapas aaen

nai kahani kitni sundar kitni bhali suhani

dadi amman hamein sunao ab ek nai kahani