daera

roz baḌhtā huuñ jahāñ se aage

phir vahīñ lauT ke aa jaatā huuñ

bār-hā toḌ chukā huuñ jin ko

unhīñ dīvāroñ se Takrātā huuñ

roz baste haiñ ka.ī shahr na.e

roz dhartī meñ samā jaate haiñ

zalzaloñ meñ thī zarā sī garmī

vo bhī ab roz hī aa jaate haiñ

jism se ruuh talak ret hī ret

na kahīñ dhuup na saaya na sarāb

kitne armān haiñ kis sahrā meñ

kaun rakhtā hai mazāroñ kā hisāb

nabz bujhtī bhī bhaḌaktī bhī hai

dil kā ma.amūl hai ghabrānā bhī

raat andhere ne andhere se kahā

ek aadat hai jiye jaanā bhī

qaus ik rañg kī hotī hai tulū

ek hī chaal bhī paimāne kī

goshe goshe meñ khaḌī hai masjid

shakl kyā ho ga.ī mai-ḳhāne kī

koī kahtā thā samundar huuñ maiñ

aur mirī jeb meñ qatra bhī nahīñ

ḳhairiyat apnī likhā kartā huuñ

ab to taqdīr meñ ḳhatra bhī nahīñ

apne hāthoñ ko paḌhā kartā huuñ

kabhī qur.āñ kabhī giitā kī tarah

chand rekhāoñ meñ sīmāoñ meñ

zindagī qaid hai siitā kī tarah

raam kab lauTeñge ma.alūm nahīñ

kaash rāvan hī koī aa jaatā

roz baDhta hun jahan se aage

phir wahin lauT ke aa jata hun

bar-ha toD chuka hun jin ko

unhin diwaron se Takraata hun

roz baste hain kai shahr nae

roz dharti mein sama jate hain

zalzalon mein thi zara si garmi

wo bhi ab roz hi aa jate hain

jism se ruh talak ret hi ret

na kahin dhup na saya na sarab

kitne arman hain kis sahra mein

kaun rakhta hai mazaron ka hisab

nabz bujhti bhi bhaDakti bhi hai

dil ka mamul hai ghabrana bhi

raat andhere ne andhere se kaha

ek aadat hai jiye jaana bhi

qaus ek rang ki hoti hai tulu

ek hi chaal bhi paimane ki

goshe goshe mein khaDi hai masjid

shakl kya ho gai mai-KHane ki

koi kahta tha samundar hun main

aur meri jeb mein qatra bhi nahin

KHairiyat apni likha karta hun

ab to taqdir mein KHatra bhi nahin

apne hathon ko paDha karta hun

kabhi quran kabhi gita ki tarah

chand rekhaon mein simaon mein

zindagi qaid hai sita ki tarah

ram kab lauTenge malum nahin

kash rawan hi koi aa jata