Daku

kal raat mirā beTā mire ghar

chehre pe munḌhe ḳhākī kapḌā

bandūq uThā.e aa pahuñchā

nau-umrī kī surḳhī se rachī us kī āñkheñ

maiñ jaan ga.ī

aur bachpan ke sandal se mañDhā us kā chehra

pahchān ga.ī

vo aayā thā ḳhud apne ghar

ghar kī chīzeñ le jaane ko

an-kahī kahī manvāne ko

bātoñ meñ duudh kī ḳhushbū thī

jo kuchh bhī saiñt ke rakkhā thā

maiñ saarī chīzeñ le aa.ī

ik la.al-e-badaḳhshāñ kī chiḌiyā

sone kā haath chhoTā sā

chāñdī kī ik nannhī taḳhtī

resham kī phuul bharī Topī

atlas kā naam likhā juzdān

juzdān meñ lipTā ik qur.āñ

par vo kaisā dīvāna thā

kuchh chhoḌ gayā kuchh toḌ gayā

aur le bhī gayā hai vo to kyā

lohe kī bad-sūrat gaaḌī

petrol kī bū bhī aa.egī

jis ke pahiye bhī rabar ke haiñ

jo baat nahīñ kar pā.egī

bachcha phir āḳhir bachcha hai

kal raat mera beTa mere ghar

chehre pe munDhe KHaki kapDa

banduq uThae aa pahuncha

nau-umri ki surKHi se rachi us ki aankhen

main jaan gai

aur bachpan ke sandal se manDha us ka chehra

pahchan gai

wo aaya tha KHud apne ghar

ghar ki chizen le jaane ko

an-kahi kahi manwane ko

baaton mein dudh ki KHushbu thi

jo kuchh bhi saint ke rakkha tha

main sari chizen le aai

ek lal-e-badaKHshan ki chiDiya

sone ka hath chhoTa sa

chandi ki ek nannhi taKHti

resham ki phul bhari Topi

atlas ka nam likha juzdan

juzdan mein lipTa ek quran

par wo kaisa diwana tha

kuchh chhoD gaya kuchh toD gaya

aur le bhi gaya hai wo to kya

lohe ki bad-surat gaDi

petrol ki bu bhi aaegi

jis ke pahiye bhi rabar ke hain

jo baat nahin kar paegi

bachcha phir aaKHir bachcha hai