dar-o-rasan

ajiib kūcha-e-rashk-e-jināñ thā dehlī kā

bahisht kahte haiñ jis ko makāñ thā dehlī kā

dimāġh bar-sar-e-haft-āsmāñ thā dehlī kā

ḳhitāb-e-ḳhitta-e-hindostāñ thā dehlī kā

ġhazab hai us ko koī shādmāñ na dekh sakā

zamīñ na dekh sakī āsmāñ na dekh sakā

hazāroñ zulf-e-parī-vash ke yaañ the saudā.ī

hazāroñ mai-kash-o-mai-ḳhvār-o-mast-o-sahbā.ī

sharāb-e-aish pilātā thā charḳh-e-mīnā.ī

qubūl karte the is dar pe sab jabīñ-sā.ī

jo aatā thā so vo ho rahtā thā usī ghar kā

zamīñ kī naaf hai ka.aba hai batn-e-mādar kā

vo taḳht-e-saltanat-o-bārgāh-e-sultānī

ki jis meñ baiThte the aa ke zill-e-sub.hānī

paroñ se sar pe humā kartā thā magas-rānī

bajā us auj pe thā da.avā-e-sulaimānī

har ek qasr ko da.avā thā tāq-e-kisrā kā

dimāġh arsh pe thā qila-e-muallā kā

zuhal kī aañkh paḌī ittifāq se nāgāh

tamām ho gayā tārāj mulk-o-māl aur jaah

ki us se ho ga.e bad-tar ġharīb shāhanshāh

ra.ī.yat us kī huī us se bhī ziyāda tabāh

vo sāhūkār na thā jis kī saakh meñ baTTā

ab us ke naam pe lagtā hai laakh meñ baTTā

milā ye hukm ki sab log yaañ se Tal jaa.eñ

isī meñ ḳhair hai jo shahr se nikal jaa.eñ

dabī hai buqchī to dikhlā ke yaañ baġhal jaa.eñ

jo kuchh hai chhoḌ yahāñ sāhab-e-daval jaa.eñ

na sar pe Topī hai un ke na paañv meñ juutī

baġhal meñ tote kā piñjḌā nabī-jī bhejo jī

yahāñ jo aan kī dekhī to daar kī sūrat

vo daar kahiye jise zulfiqār kī sūrat

miTā dī chashm-e-zadan meñ hazār kī sūrat

nazar paḌī na kisī be-qarār kī sūrat

ba-rañg-e-tīr-e-shahāb aag meñ jale lākhoñ

sipurd dār-o-rasan ho ga.e gale lākhoñ

ajib kucha-e-rashk-e-jinan tha dehli ka

bahisht kahte hain jis ko makan tha dehli ka

dimagh bar-sar-e-haft-asman tha dehli ka

KHitab-e-KHitta-e-hindostan tha dehli ka

ghazab hai us ko koi shadman na dekh saka

zamin na dekh saki aasman na dekh saka

hazaron zulf-e-pari-wash ke yan the saudai

hazaron mai-kash-o-mai-KHwar-o-mast-o-sahbai

sharab-e-aish pilata tha charKH-e-minai

qubul karte the is dar pe sab jabin-sai

jo aata tha so wo ho rahta tha usi ghar ka

zamin ki naf hai kaba hai batn-e-madar ka

wo taKHt-e-saltanat-o-bargah-e-sultani

ki jis mein baiThte the aa ke zill-e-subhani

paron se sar pe huma karta tha magas-rani

baja us auj pe tha dawa-e-sulaimani

har ek qasr ko dawa tha taq-e-kisra ka

dimagh arsh pe tha qila-e-mualla ka

zuhal ki aankh paDi ittifaq se nagah

tamam ho gaya taraj mulk-o-mal aur jah

ki us se ho gae bad-tar gharib shahanshah

raiyat us ki hui us se bhi ziyaada tabah

wo sahukar na tha jis ki sakh mein baTTa

ab us ke nam pe lagta hai lakh mein baTTa

mila ye hukm ki sab log yan se Tal jaen

isi mein KHair hai jo shahr se nikal jaen

dabi hai buqchi to dikhla ke yan baghal jaen

jo kuchh hai chhoD yahan sahab-e-dawal jaen

na sar pe Topi hai un ke na panw mein juti

baghal mein tote ka pinjDa nabi-ji bhejo ji

yahan jo aan ki dekhi to dar ki surat

wo dar kahiye jise zulfiqar ki surat

miTa di chashm-e-zadan mein hazar ki surat

nazar paDi na kisi be-qarar ki surat

ba-rang-e-tir-e-shahab aag mein jale lakhon

sipurd dar-o-rasan ho gae gale lakhon