dashta

raat dhundlī tīrgī namnāk ghaas

Thahrī Thahrī muzmahil phūloñ kī baas

tanhā udaas

baaġh kī dil-sard ḳhāmoshī se duur

an-ginat tāroñ kā be-tartīb nuur

sāmān-e-tūr

uTh rahī hai jaise mauj-e-nīm-tāb

kahkashāñ ye bārhā dekhā sarāb

manzil kā ḳhvāb

phuul kar apnī tamannā kā ma.aal

gosha-e-dil meñ vahī zohra-jamāl

laayā ḳhayāl

jis ne vā kī mujh pe chashm-e-iltifāt

mujh ko samjhā apnī saarī kā.enāt

har talḳh raat

aaj us kī dilkashī piTtī lakīr

us kī baḌhtī tīrgī kā ham-safīr

merā zamīr

dekhtā huuñ phir nujūm-e-ḳhush-ḳhirām

jaane kab tak legā mujh se intiqām

ye husn-e-bām

raat dhundli tirgi namnak ghas

Thahri Thahri muzmahil phulon ki bas

tanha udas

bagh ki dil-sard KHamoshi se dur

an-ginat taron ka be-tartib nur

saman-e-tur

uTh rahi hai jaise mauj-e-nim-tab

kahkashan ye barha dekha sarab

manzil ka KHwab

phul kar apni tamanna ka maal

gosha-e-dil mein wahi zohra-jamal

laya KHayal

jis ne wa ki mujh pe chashm-e-iltifat

mujh ko samjha apni sari kaenat

har talKH raat

aaj us ki dilkashi piTti lakir

us ki baDhti tirgi ka ham-safir

mera zamir

dekhta hun phir nujum-e-KHush-KHiram

jaane kab tak lega mujh se intiqam

ye husn-e-baam