dal badli

chalte chalte daf.atan paTrī badalne kā chalan

thā siyāsat ke qalābāzoñ kā yak mash.hūr fan

fā.eda hotā thā vaqtī taur par is khel meñ

go sakā hazrāt kahte the use bāzār-pan

ahl-e-sheristān ne bhī ab use apnā liyā

kār-āmad dekh kar ye nusḳha-e-āhan-shikan

ho rahā hai is qadar maqbūl ye nusḳha ki ab

dil badalte rahte haiñ din raat arbāb-e-suḳhan

nit nayā bahrūp lāzim hai pa.e iz.hār-e-zāt

jab nazar ke sāmne ho fan barā.e makr-o-fan

vo zamāna jab ki bazm-e-sher thī ik razm-gāh

chhoḌ dī thī har na.e shā.ir ne raftār-e-kuhan

gholte rahte the vo hazrāt jām-e-sher meñ

naġhma-e-bulbul ke badle shorish-e-dār-o-rasan

hoTaloñ meñ baiTh kar hotā thā zikr-e-inqalāb

apne sar se bāñdhe phirte the taḳhayyul meñ kafan

in meñ kuchh leader sifat the aur kuchh voluntēr

jhunD meñ surḳhāb ke hoñ jis tarah zāġh-o-zaġhan

na.ara baazī meñ agar hote the leader paav ser

in ke har voluntēr kā vazn hotā DeḌh man

rafta rafta shor-e-ġhauġhā.ī suḳhan kā jab thamā

lag gayā jab māh-e-naḳhshab meñ havādis kā gahan

aa ga.e kuchh aur kartab-bāz bazm-e-sher meñ

ik zarā sā jānte the jo nazar-bandī kā fan

sūñgh kar mausam kī bū aur ruḳh havā kā dekh kar

kechulī badlī har ik voluntēr ne daf.atan

subah dam dekhā to teddy suiT meñ malbūs haiñ

pheñk kar chupke se apnā inqilābī pairahan

sar ke bāloñ kī safedī ho ga.ī ġharq-e-ḳhizāb

tah-ba-tah ġhāza lagā kar duur kī ruḳh kī shikan

shā.irī kī umr thī go biis yā pachchīs saal

lekin apne fan meñ vo bil-qasd laa.e bāl-pan

kar diyā bahr-e-sadārat pesh apne aap ko

jab banā.ī chand nau-mashqoñ ne koī anjuman

is liye ghuspaiTh karte ye sab voluntēr

ban ga.e ab ḳhaam zehnoñ ke imām-e-fikr-o-fan

in kā maqsad hai agar kuchh to husūl-e-manfa.at

inqilābī shā.irī ho yā muammatī suḳhan

chalte chalte dafatan paTri badalne ka chalan

tha siyasat ke qalabazon ka yak mashhur fan

faeda hota tha waqti taur par is khel mein

go saka hazraat kahte the use bazar-pan

ahl-e-sheristan ne bhi ab use apna liya

kar-amad dekh kar ye nusKHa-e-ahan-shikan

ho raha hai is qadar maqbul ye nusKHa ki ab

dil badalte rahte hain din raat arbab-e-suKHan

nit naya bahrup lazim hai pae izhaar-e-zat

jab nazar ke samne ho fan barae makr-o-fan

wo zamana jab ki bazm-e-sher thi ek razm-gah

chhoD di thi har nae shair ne raftar-e-kuhan

gholte rahte the wo hazraat jam-e-sher mein

naghma-e-bulbul ke badle shorish-e-dar-o-rasan

hoTalon mein baiTh kar hota tha zikr-e-inqalab

apne sar se bandhe phirte the taKHayyul mein kafan

in mein kuchh leader sifat the aur kuchh wolunteer

jhunD mein surKHab ke hon jis tarah zagh-o-zaghan

nara bazi mein agar hote the leader paw ser

in ke har wolunteer ka wazn hota DeDh man

rafta rafta shor-e-ghaughai suKHan ka jab thama

lag gaya jab mah-e-naKHshab mein hawadis ka gahan

aa gae kuchh aur kartab-baz bazm-e-sher mein

ek zara sa jaante the jo nazar-bandi ka fan

sungh kar mausam ki bu aur ruKH hawa ka dekh kar

kechuli badli har ek wolunteer ne dafatan

subah dam dekha to teddy suiT mein malbus hain

phenk kar chupke se apna inqilabi pairahan

sar ke baalon ki safedi ho gai gharq-e-KHizab

tah-ba-tah ghaza laga kar dur ki ruKH ki shikan

shairi ki umr thi go bis ya pachchis sal

lekin apne fan mein wo bil-qasd lae baal-pan

kar diya bahr-e-sadarat pesh apne aap ko

jab banai chand nau-mashqon ne koi anjuman

is liye ghuspaiTh karte ye sab wolunteer

ban gae ab KHam zehnon ke imam-e-fikr-o-fan

in ka maqsad hai agar kuchh to husul-e-manfat

inqilabi shairi ho ya muammati suKHan