dam nikle

likhāne naam sachche āshiqoñ meñ jab bhī ham nikle

irādoñ meñ hamāre jaane kitne pech-o-ḳham nikle

ye sochā thā ki ghar se bhaag kar shādī rachāeñge

magar jab vaqt aaya to na vo nikle na ham nikle

sunā hai rāste hī meñ police ne dhar liyā un ko

hamāre dil pe jab karne ko vo mashq-e-sitam nikle

dimāġh un kā jo dekhā aur dil kī bhī talāshī lī

ka.ī pistaul naḳhroñ ke ka.ī ġhusse ke bam nikle

jhagaḌ kar jab kahā begam ne ham se ghar se jaane ko

bahut be-ābrū ho kar ḳhud apne ghar se ham nikle

jo hotā aur koī to nikal jaatā vo ġhusse meñ

magar ham bā-dil-e-nā-ḳhvāsta bā-chashm-e-nam nikle

hamārā hausla to dekhiye ki lunch khāte hī

nahīñ lauTeñge ab ham shaam tak khā kar qasam nikle

magar jab shaam se pahle hī bhūke peT lauT aa.e

vo ta.ana de ke bolīñ aap to sābit-qadam nikle

zamāne ke satā.e haiñ jo logoñ ko hañsāte haiñ

kuredā jab bhī dil un kā hazāroñ ġham hī ġham nikle

karam kī baat hai mere gunah a.amāl-nāme meñ

ye sochā thā bahut hoñge magar dekhā to kam nikle

buḌhāpe meñ bhī merī 'ḳhvāh-maḳhvāh' hai āḳhirī ḳhvāhish

hoñ ghar meñ bīviyāñ itnī ki har biivī pe dam nikle

likhane nam sachche aashiqon mein jab bhi hum nikle

iradon mein hamare jaane kitne pech-o-KHam nikle

ye socha tha ki ghar se bhag kar shadi rachaenge

magar jab waqt aaya to na wo nikle na hum nikle

suna hai raste hi mein police ne dhar liya un ko

hamare dil pe jab karne ko wo mashq-e-sitam nikle

dimagh un ka jo dekha aur dil ki bhi talashi li

kai pistaul naKHron ke kai ghusse ke bam nikle

jhagaD kar jab kaha begam ne hum se ghar se jaane ko

bahut be-abru ho kar KHud apne ghar se hum nikle

jo hota aur koi to nikal jata wo ghusse mein

magar hum ba-dil-e-na-KHwasta ba-chashm-e-nam nikle

hamara hausla to dekhiye ki lunch khate hi

nahin lauTenge ab hum sham tak kha kar qasam nikle

magar jab sham se pahle hi bhuke peT lauT aae

wo tana de ke bolin aap to sabit-qadam nikle

zamane ke satae hain jo logon ko hansate hain

kureda jab bhi dil un ka hazaron gham hi gham nikle

karam ki baat hai mere gunah aamal-name mein

ye socha tha bahut honge magar dekha to kam nikle

buDhape mein bhi meri 'KHwah-maKHwah' hai aaKHiri KHwahish

hon ghar mein biwiyan itni ki har biwi pe dam nikle