dar-asl ye nazm likhi hi nahin gai

ba.az bāteñ bahut ma.amūlī hotī haiñ

magar un ke daañt puure jīvan ko kāTte rahte haiñ

ye ek nazm ke darmiyān huā āġhāz thā jo iḳhtitām tak pahuñchne se pahle hī puurī nazm samet gum ho gayā

shāyad ba.az bahut ma.amūlī bātoñ ke daañt ek puurī nazm ke jīvan ko musalsal kāTte rahne ke liye hoñge

so tumhārī nazm gum ho ga.ī 'hamesh'

so tum bhī gum ho jaao 'hamesh'

an-dekhī tahdāriyoñ meñ gum ho jaao 'hamesh'

is se pahle ki kisī āvāz ke daañt adam-e-tārīk meñ kauñd jaa.eñ

kyuuñ na tum abhī ye jaan lo ki

ma.amūlī se ma.amūlī baat apne hisse kī āvāz se guzar ga.e na jānñe vaale ke liye to bāzgasht ban jaatī hai

magar jānñe vaale ke liye maut ke daañt

varna ye usī kā to saundarya jahāñ-guzīda hai ki

dhuup itnī dhuāñ-dhār gir rahī hai ki bijlī ke khambe aur chale ga.e haiñ

ab kabhī kuchh nahīñ sunā.ī de sakegā

pahle bhī kyā sunā.ī diyā hogā

ki ek abhāgī samā.at ko ek ghanTe kī nasha gumān zarb-e-nādīda

yā tiin minute kī sukūt-e-ḳhush-gavār Thokar par rakh liyā hogā

aur kahā gayā ki ab intizār na karnā ki ab bahut ho chukā ki nahīñ chāhiye ki jo kabhī chāhiye thā

so jis raah par aaj tum udaas maqsūm baiThe ho

is se tumhāre hisse kī koī man-chāhī raah to ke nahīñ miltī

vo koī aur zamāna rahā hogā

varna kahāñ kī chambal nadī aur kahāñ us kā paanī

aur kabhī kināre se Daalā huā purānā tāñbe kā paisa us kī tah meñ paḌā nazar aa rahā thā

to vahāñ ab tak kitnī hī hāsid sautelī parchhā.iyoñ kā nuzūl huā hogā

tumhāre āñsuoñ ke sañkan ko an-dekhī miTTī meñ dabā ke uupar se paaT dene ke liye

so gum ho jaao 'hamesh'

us kī nazar se aur apnī nazar se bhī

aisā to kabhī nahīñ huā hogā

ki agar kisī ne ḳhudā ko nahīñ dekhā

to kyā ḳhudā ne bhī kisī ko nahīñ dekhā

ki agar koī ḳhudā se nahīñ milā

to kyā ḳhudā bhī kisī se nahīñ milā

phir vo kaun hai jo apne jazb ke hissa kī āsmānī kañghī mol le ke apne sar ke beach

maañg kāḌhtā hai

us samay jab us ke ġham-dīda hisse kī duniyā meñ us ke lutf-e-nādīda kī bārish ho rahī hotī hai

yā shāyad kisī jahān-e-āsūda kī ummīd meñ kisī jahān-e-nā-āsūda se guzarnā paḌtā hai

tab vāpas le jaane ke liye āyatoñ se shukr ke ek daane ko sameT ke

apnī jagah le jaane vaalī chiyūñTiyoñ ke jamāv se purānī yādoñ meñ mahfūz rakhī

hāthiyoñ kī qatār se e'tibār-e-adam meñ zam honā paḌtā hai

bhuul jaao ki tum us ke liye siyāh gulū-band meñ chamakte tiin nagoñ meñ se kisī ek nag meñ bhī shāmil ho sakoge

baz baaten bahut mamuli hoti hain

magar un ke dant pure jiwan ko kaTte rahte hain

ye ek nazm ke darmiyan hua aaghaz tha jo iKHtitam tak pahunchne se pahle hi puri nazm samet gum ho gaya

shayad baz bahut mamuli baaton ke dant ek puri nazm ke jiwan ko musalsal kaTte rahne ke liye honge

so tumhaari nazm gum ho gai 'hamesh'

so tum bhi gum ho jao 'hamesh'

an-dekhi tahdariyon mein gum ho jao 'hamesh'

is se pahle ki kisi aawaz ke dant adam-e-tarik mein kaund jaen

kyun na tum abhi ye jaan lo ki

mamuli se mamuli baat apne hisse ki aawaz se guzar gae na jaanne wale ke liye to bazgasht ban jati hai

magar jaanne wale ke liye maut ke dant

warna ye usi ka to saundarya jahan-guzida hai ki

dhup itni dhuan-dhaar gir rahi hai ki bijli ke khambe aur chale gae hain

ab kabhi kuchh nahin sunai de sakega

pahle bhi kya sunai diya hoga

ki ek abhagi samaat ko ek ghanTe ki nasha guman zarb-e-nadida

ya tin minute ki sukut-e-KHush-gawar Thokar par rakh liya hoga

aur kaha gaya ki ab intizar na karna ki ab bahut ho chuka ki nahin chahiye ki jo kabhi chahiye tha

so jis rah par aaj tum udas maqsum baiThe ho

is se tumhaare hisse ki koi man-chahi rah to ke nahin milti

wo koi aur zamana raha hoga

warna kahan ki chambal nadi aur kahan us ka pani

aur kabhi kinare se Dala hua purana tanbe ka paisa us ki tah mein paDa nazar aa raha tha

to wahan ab tak kitni hi hasid sauteli parchhaiyon ka nuzul hua hoga

tumhaare aansuon ke sankan ko an-dekhi miTTi mein daba ke upar se paT dene ke liye

so gum ho jao 'hamesh'

us ki nazar se aur apni nazar se bhi

aisa to kabhi nahin hua hoga

ki agar kisi ne KHuda ko nahin dekha

to kya KHuda ne bhi kisi ko nahin dekha

ki agar koi KHuda se nahin mila

to kya KHuda bhi kisi se nahin mila

phir wo kaun hai jo apne jazb ke hissa ki aasmani kanghi mol le ke apne sar ke beach

mang kaDhta hai

us samay jab us ke gham-dida hisse ki duniya mein us ke lutf-e-nadida ki barish ho rahi hoti hai

ya shayad kisi jahan-e-asuda ki ummid mein kisi jahan-e-na-asuda se guzarna paDta hai

tab wapas le jaane ke liye aayaton se shukr ke ek dane ko sameT ke

apni jagah le jaane wali chiyunTiyon ke jamaw se purani yaadon mein mahfuz rakhi

hathiyon ki qatar se e'tibar-e-adam mein zam hona paDta hai

bhul jao ki tum us ke liye siyah gulu-band mein chamakte tin nagon mein se kisi ek nag mein bhi shamil ho sakoge