dar-guzar

kaun vo log the ab yaad nahīñ aatā hai

pheñk aa.e the mujhe yūsuf-e-kan.āñ kī tarah

khīñch laa.e the mujhe shahr ke bāzāroñ meñ

sab ko dikhlāte the ā.īna-e-hairāñ kī tarah

log kahte haiñ ki koī bhī ḳharīdār na thā

kaun vo log the ab yaad nahīñ aatā hai

chhoḌ aa.e the sulagte hue maidāñ meñ mujhe

eḌiyāñ ragḌīñ magar chashma-e-zamzam na milā

kaise tanhā kiyā kis hāl-e-pareshāñ meñ mujhe

kaun vo log the ab yaad nahīñ aatā hai

bāġh-e-āsā.ish hastī bhī dikhāyā mujh ko

koī shaddād-numā thā koī namrūd-sifat

be-gunāhī kī sazā thī ki vo sach kā in.aam

rasan o daar ke mimbar pe biThāyā mujh ko

kaun vo log the ab yaad nahīñ aatā hai

koī insān koī shaitāñ koī chehra koī naam

hāfiza shīsha kī mānind dark jaatā hai

ai ḳhudā tujh se to poshīda nahīñ hai koī raaz

dost hoñge ki vo dushman mirā pahuñchā de salām

shukr kartā huuñ ki duniyā ke ḳhazāne ne mujhe

koī motī na sahī aañkh to giryāñ dī hai

kyā diyā kyā na diyā tū ne ḳhudā-e-fayyāz

kyā ye kam hai ki mujhe daulat-e-nisyāñ dī hai

kaun wo log the ab yaad nahin aata hai

phenk aae the mujhe yusuf-e-kanan ki tarah

khinch lae the mujhe shahr ke bazaron mein

sab ko dikhlate the aaina-e-hairan ki tarah

log kahte hain ki koi bhi KHaridar na tha

kaun wo log the ab yaad nahin aata hai

chhoD aae the sulagte hue maidan mein mujhe

eDiyan ragDin magar chashma-e-zamzam na mila

kaise tanha kiya kis haal-e-pareshan mein mujhe

kaun wo log the ab yaad nahin aata hai

bagh-e-asaish hasti bhi dikhaya mujh ko

koi shaddad-numa tha koi namrud-sifat

be-gunahi ki saza thi ki wo sach ka inam

rasan o dar ke mimbar pe biThaya mujh ko

kaun wo log the ab yaad nahin aata hai

koi insan koi shaitan koi chehra koi nam

hafiza shisha ki manind dark jata hai

ai KHuda tujh se to poshida nahin hai koi raaz

dost honge ki wo dushman mera pahuncha de salam

shukr karta hun ki duniya ke KHazane ne mujhe

koi moti na sahi aankh to giryan di hai

kya diya kya na diya tu ne KHuda-e-fayyaz

kya ye kam hai ki mujhe daulat-e-nisyan di hai