daraKHt mere dost

daraḳht! mere dost

tum mil jaate ho kisī na kisī moḌ par

aur āsān kar dete ho safar

tumhāre pair kī uñgliyāñ

jamī rahīñ pātāl ke bhedoñ par

qaa.em rahe mere dost

tumhāre tane kī matānat aur quvvat

dhuup aur bārish tumheñ apne tohfoñ se navāztī rahe

tum bahut pur-vaqār aur saada ho

mere thaile ko jānñā chāhte ho

zarūr.... ye lo maiñ ise kholtā huuñ

roTiyāñ duā.eñ aur nazmeñ

mere paas is se ziyāda kuchh nahīñ

ek shā.er ke paas is se ziyāda kuchh nahīñ hotā

dost dukh denā tum ne sīkhā hī nahīñ

tum ne na to mujh se shā.erī kā matlab pūchhā

aur na kabhī mere mutāle.e par shak kiyā

aisā hī honā chāhiye dostoñ ko

agar mere paas ik aur zindagī hotī to

to maiñ apnī pahlī zindagī tumhārī jaḌoñ par guzār detā

magar maiñ ghar se ḳhāndān bhar ḳhushiyoñ ke liye niklā huuñ

aur vahāñ merā intizār kiyā jā rahā hai

tum ne mere dost

haañ tum ne

bahut kuchh sikhāyā hai mujhe

maslan zamīn aur āsmānī bijlī

aur havā

aur intizār

aur dūsroñ ke liye zinda rahnā

bahut qīmtī haiñ ye bāteñ

maiñ kyā de saktā huuñ is fayyāzī kā javāb

mere paas tumhāre liye

ek roTī aur duā hai

roTī: tumhārī chiyūñTiyoñ ke liye

duā tumhāre āḳhirī din ke liye

mujhe ma.alūm hai tum ne kulhāḌī ke musāfahe

aur aarī kī hañsī se kabhī ḳhauf nahīñ khāyā

magar tum rok nahīñ sakte inheñ

koī bhī nahīñ rok saktā

ḳhudā kare

ḳhudā kare tumhārī shāḳhoñ se ek jhoñpaḌī banā.ī jaa.e

bāzuoñ ke ghere meñ na aane vaale tumhāre

tane kī lakḌī

bahut kaafī hai

do pahiyoñ aur ek kashtī ke liye

dost: ham phir mileñge

musāfir aur chhakḌā

musāfir aur kashtī

kahīñ na kahīñ ham phir ek saath hoñge

kahīñ na kahīñ

ek saath.... ham sāmnā kareñge

havā kā aur rāstoñ kā

masarrat aur maut kaa....

daraKHt! mere dost

tum mil jate ho kisi na kisi moD par

aur aasan kar dete ho safar

tumhaare pair ki ungliyan

jami rahin patal ke bhedon par

qaem rahe mere dost

tumhaare tane ki matanat aur quwwat

dhup aur barish tumhein apne tohfon se nawazti rahe

tum bahut pur-waqar aur sada ho

mere thaile ko jaanna chahte ho

zarur ye lo main ise kholta hun

roTiyan duaen aur nazmen

mere pas is se ziyaada kuchh nahin

ek shaer ke pas is se ziyaada kuchh nahin hota

dost dukh dena tum ne sikha hi nahin

tum ne na to mujh se shaeri ka matlab puchha

aur na kabhi mere mutalee par shak kiya

aisa hi hona chahiye doston ko

agar mere pas ek aur zindagi hoti to

to main apni pahli zindagi tumhaari jaDon par guzar deta

magar main ghar se KHandan bhar KHushiyon ke liye nikla hun

aur wahan mera intizar kiya ja raha hai

tum ne mere dost

han tum ne

bahut kuchh sikhaya hai mujhe

maslan zamin aur aasmani bijli

aur hawa

aur intizar

aur dusron ke liye zinda rahna

bahut qimti hain ye baaten

main kya de sakta hun is fayyazi ka jawab

mere pas tumhaare liye

ek roTi aur dua hai

roTi: tumhaari chiyunTiyon ke liye

dua tumhaare aaKHiri din ke liye

mujhe malum hai tum ne kulhaDi ke musafahe

aur aari ki hansi se kabhi KHauf nahin khaya

magar tum rok nahin sakte inhen

koi bhi nahin rok sakta

KHuda kare

KHuda kare tumhaari shaKHon se ek jhonpaDi banai jae

bazuon ke ghere mein na aane wale tumhaare

tane ki lakDi

bahut kafi hai

do pahiyon aur ek kashti ke liye

dost: hum phir milenge

musafir aur chhakDa

musafir aur kashti

kahin na kahin hum phir ek sath honge

kahin na kahin

ek sath hum samna karenge

hawa ka aur raston ka

masarrat aur maut ka