daraKHton ka silsila

yahāñ se daraḳhtoñ kā har silsila ḳhatm hotā hai

ab sāmne zard chatiyal zamīneñ haiñ

ḳhvāboñ ke marqad

irādoñ kī lāsheñ

rafīqoñ ke pinjar

bikharte hue roz-o-shab

āsmānoñ kī yūrish

yahāñ aaj ham bhī

pareshān zehnoñ se girte hue biij bo deñ

ki roz-e-qayāmat meñ tāḳhīr na rah jaa.e koī

ye chatiyal zamīneñ sunā hai ki banjar nahīñ haiñ

ye fasl-e-gul kā

shagufta-o-sarsabz imkāñ

abhī mere tere lahū meñ

bigaḌtī sañvartī

rag-o-pai meñ jaltī

kahānī ke anjām kā muntazir hai

yahan se daraKHton ka har silsila KHatm hota hai

ab samne zard chatiyal zaminen hain

KHwabon ke marqad

iradon ki lashen

rafiqon ke pinjar

bikharte hue roz-o-shab

aasmanon ki yurish

yahan aaj hum bhi

pareshan zehnon se girte hue bij bo den

ki roz-e-qayamat mein taKHir na rah jae koi

ye chatiyal zaminen suna hai ki banjar nahin hain

ye fasl-e-gul ka

shagufta-o-sarsabz imkan

abhi mere tere lahu mein

bigaDti sanwarti

rag-o-pai mein jalti

kahani ke anjam ka muntazir hai