dard-e-mushtarak

mizha-e-ḳhār pe kis tarah bhalā paa.e qarār

āriz-e-gul pe na jab qatra-e-shabnam Thahre

hādsa hai ki dar aa.ī ye masarrat kī kiran

varna is dil pe the tārīkī-e-ġham ke pahre

dard-e-mahrūmī-e-jāved hamārī qismat

rāhat-e-vasl-o-mulāqāt ke dar band rahe

sāl-hā-sāl rivāyāt ke zindānoñ meñ

kitne biphre hue jazbāt nazar-band rahe

sim-sim-e-sīm se khul jaate haiñ uqdoñ ke pahāḌ

jagmagā uThte haiñ phūloñ ke diye sahrā meñ

ġhāza-e-zar se hai ruḳhsār-e-tamaddun kā nikhār

dil to ik jins-e-faromāya hai is duniyā meñ

chaḌhte sūraj ke parastār haiñ duniyā vaale

Dūbte chāñd ko bin dekhe guzar jaate haiñ

kaun juuḌe meñ sajātā hai bhalā dhuul ke phuul

shāḳh ke ḳhaar bhī āñkhoñ meñ jagah paate haiñ

tū mirī hai ki yahāñ koī nahīñ thā merā

maiñ tirā huuñ ki tujhe koī bhī apnā na sakā

kitnī pyārī hai suhānī hai ye duniyā jis meñ

tū bhī Thukrā.ī ga.ī mujh ko bhī Thukrāyā gayā

mizha-e-KHar pe kis tarah bhala pae qarar

aariz-e-gul pe na jab qatra-e-shabnam Thahre

hadsa hai ki dar aai ye masarrat ki kiran

warna is dil pe the tariki-e-gham ke pahre

dard-e-mahrumi-e-jawed hamari qismat

rahat-e-wasl-o-mulaqat ke dar band rahe

sal-ha-sal riwayat ke zindanon mein

kitne biphre hue jazbaat nazar-band rahe

sim-sim-e-sim se khul jate hain uqdon ke pahaD

jagmaga uThte hain phulon ke diye sahra mein

ghaza-e-zar se hai ruKHsar-e-tamaddun ka nikhaar

dil to ek jins-e-faromaya hai is duniya mein

chaDhte suraj ke parastar hain duniya wale

Dubte chand ko bin dekhe guzar jate hain

kaun juDe mein sajata hai bhala dhul ke phul

shaKH ke KHar bhi aankhon mein jagah pate hain

tu meri hai ki yahan koi nahin tha mera

main tera hun ki tujhe koi bhi apna na saka

kitni pyari hai suhani hai ye duniya jis mein

tu bhi Thukrai gai mujh ko bhi Thukraya gaya