dard mushtarak

maiñ ab tak ye samajhtī thī

kahānī kā na dil hai

aur na goyā.ī

salīqa hī nahīñ inkār kā is ko

hamesha likhne vaale kī

razā par chhoḌ detī hai

vajūd apnā

kabhī muñh se nahīñ kahtī

ki mujh ko is taraf moḌo

jidhar maiñ chāhtī huuñ

aur yahāñ tak ki

ka.ī kirdār mar jaate haiñ

phir bhī aañkh se is kī

kabhī aañsū nahīñ girte

kahānī kitnī sābir hai

kabhī āġhāz hī miltā nahīñ is ko

kabhī anjām se mahrūm rahtī hai

kabhī aisā bhī hotā hai

ki afsāne kā ḳhāliq

apne afsāne meñ is ko

paañv bhī dharne nahīñ detā

to ye ḳhāmoshī sī

ik karb kī chādar meñ

apnā muñh chhupā.e

lauT jaatī hai

koī shikva nahīñ kartī

magar kal shab

maiñ jab tanhā.ī meñ baiThī

kahānī likh rahī thī to

mujhe aisā lagā jaise

varaq par ek aañsū hai

jo maiñ ne ġhaur se dekhā

jahāñ aurat likhā maiñ ne

vahīñ vo ashk Tapkā thā

main ab tak ye samajhti thi

kahani ka na dil hai

aur na goyai

saliqa hi nahin inkar ka is ko

hamesha likhne wale ki

raza par chhoD deti hai

wajud apna

kabhi munh se nahin kahti

ki mujh ko is taraf moDo

jidhar main chahti hun

aur yahan tak ki

kai kirdar mar jate hain

phir bhi aankh se is ki

kabhi aansu nahin girte

kahani kitni sabir hai

kabhi aaghaz hi milta nahin is ko

kabhi anjam se mahrum rahti hai

kabhi aisa bhi hota hai

ki afsane ka KHaliq

apne afsane mein is ko

panw bhi dharne nahin deta

to ye KHamoshi si

ek karb ki chadar mein

apna munh chhupae

lauT jati hai

koi shikwa nahin karti

magar kal shab

main jab tanhai mein baiThi

kahani likh rahi thi to

mujhe aisa laga jaise

waraq par ek aansu hai

jo main ne ghaur se dekha

jahan aurat likha main ne

wahin wo ashk Tapka tha