darKHwast

ta.alluq is tarah toḌā nahīñ karte

ki phir se joḌnā dushvār ho jaa.e

hayāt ik zahr meñ Duubī huī talvār ho jaa.e

mohabbat is tarah chhoḌā nahīñ karte

ḳhafā hone kī rasmeñ haiñ

bigaḌne ke tarīqe haiñ

rivāj-o-rasm tark-e-dostī par sau kitābeñ haiñ

likhā hai jin meñ

rasta vaz.a-dārī kā yūñhī chhoḌā nahīñ karte

ta.alluq is tarah toḌā nahīñ karte

kabhī bulbul guloñ kī ḳhāmushī se ruuTh jaatī hai

par agle saal

sab kuchh bhuul kar phir lauT aatī hai

agar paudoñ se paanī duur ho jaa.e

to ham-sāya daraḳhtoñ kī jaḌoñ ke haath

paiġhāmāt jaate haiñ

mohabbat meñ sabhī ik dūsre ko āzmāte haiñ

magar aisā nahīñ karte

ki har ummīd har imkān miT jaa.e

kahāñ tak khīñchnī hai Dor

ye andāza rakhte haiñ

hamesha chār-dīvārī meñ ik darvāza rakhte haiñ

judā.ī mustaqil ho jaa.e

to ye zindagī zindān ho jaa.e

agar ḳhushbū havāoñ se marāsim munqata.a kar le

to ḳhud meñ Duub kar be-jān ho jaa.e

suno

jiine se muñh moḌā nahīñ karte

mohabbat is tarah chhoḌā nahīñ karte

talluq is tarah toDa nahin karte

ki phir se joDna dushwar ho jae

hayat ek zahr mein Dubi hui talwar ho jae

mohabbat is tarah chhoDa nahin karte

KHafa hone ki rasmen hain

bigaDne ke tariqe hain

riwaj-o-rasm tark-e-dosti par sau kitaben hain

likha hai jin mein

rasta waza-dari ka yunhi chhoDa nahin karte

talluq is tarah toDa nahin karte

kabhi bulbul gulon ki KHamushi se ruTh jati hai

par agle sal

sab kuchh bhul kar phir lauT aati hai

agar paudon se pani dur ho jae

to ham-saya daraKHton ki jaDon ke hath

paighamat jate hain

mohabbat mein sabhi ek dusre ko aazmate hain

magar aisa nahin karte

ki har ummid har imkan miT jae

kahan tak khinchni hai Dor

ye andaza rakhte hain

hamesha chaar-diwari mein ek darwaza rakhte hain

judai mustaqil ho jae

to ye zindagi zindan ho jae

agar KHushbu hawaon se marasim munqata kar le

to KHud mein Dub kar be-jaan ho jae

suno

jine se munh moDa nahin karte

mohabbat is tarah chhoDa nahin karte