darwaza khula rakhna

dil dard kī shiddat se ḳhūñ-gashta o sī-pāra

is shahr meñ phirtā hai ik vahshī-o-āvāra

shā.er hai ki āshīq hai, jogī hai ki banjāra

darvāza khulā rakhnā

siine se ghaTā uTThe āñkhoñ se jhaḌī barse

phāgun kā nahīñ bādal, jo chār-ghaḌī barse

barkhā hai ye bhādoñ kii, barse to baḌī barse

darvāza khulā rakhnā

āñkhoñ meñ to ik aalam āñkhoñ meñ to duniyā hai

hoñToñ pe magar mohreñ muñh se nahīñ kahtā hai

kis chiiz ko kho baiThā kyā DhūñDne niklā hai

darvāza khulā rakhnā

haañ thaam mohabbat kī gar thaam sake Dorī

sājan hai tirā sājan ab tujh se to kyā chorī

ye jis kī munādī hai bastī meñ tirī gorī

darvāza khulā rakhnā

shikvoñ ko uThā rakhnā, āñkhoñ ko bichhā rakhnā

ik sham.a darīche kī chaukhaT pe jalā rakhnā

māyūs na phir jaa.e, haañ pās-e-vafā rakhnā

darvāza khulā rakhnā

darvāza khulā rakhnā

dil dard ki shiddat se KHun-gashta o si-para

is shahr mein phirta hai ek wahshi-o-awara

shaer hai ki aashiq hai, jogi hai ki banjara

darwaza khula rakhna

sine se ghaTa uTThe aankhon se jhaDi barse

phagun ka nahin baadal, jo chaar-ghaDi barse

barkha hai ye bhadon ki, barse to baDi barse

darwaza khula rakhna

aankhon mein to ek aalam aankhon mein to duniya hai

honTon pe magar mohren munh se nahin kahta hai

kis chiz ko kho baiTha kya DhunDne nikla hai

darwaza khula rakhna

han tham mohabbat ki gar tham sake Dori

sajan hai tera sajan ab tujh se to kya chori

ye jis ki munadi hai basti mein teri gori

darwaza khula rakhna

shikwon ko uTha rakhna, aankhon ko bichha rakhna

ek shama dariche ki chaukhaT pe jala rakhna

mayus na phir jae, han pas-e-wafa rakhna

darwaza khula rakhna

darwaza khula rakhna