dasht-e-be-aman

tujhe yaad karte karte

tirī raah takte takte

mire ajnabī musāfir

ka.ī din guzar ga.e haiñ

koī shaam aa rahī hai:

koī ḳhushnumā sitāra jo falak pe hañs rahā hai kisī mah-jabīñ kī sūrat

jo nazar ko Das rahā hai

vahī ek isti.āra

tirī yaad rahguzar par mirā ham-safar banā hai

vahī ik ziyā salāmat

sar-e-shām tīrgī meñ

mire kaam aa rahī hai

mire rāste ke aage

kisī raat kā guzar hai

kahīñ vahm sar-ba-sar hai

kahīñ ḳhauf kā asar hai

kahīñ sarsarāhaTeñ haiñ

kahīñ jhunjhunāhaTeñ haiñ

nahīñ dasht-e-hū meñ aahū

nahīñ jañgaloñ meñ jugnū

tirī yaad vo khilaunā jise toḌ bhī na pā.ūñ

kahīñ chhoḌ bhī na pā.ūñ

abhī nisf shab hai guzrī

tujhe yaad kar rahā huuñ tire ḳhvāb dekhtā huuñ

yahī jism hai bichhaunā isī jaañ ko oḌhnā hai

huī sub.h dar pe dastak

tire ḳhvāb jā chuke haiñ

tirī yaad bhī hai ruḳhsat

na.ī aarzū khaḌī hai

na.e log mil ga.e haiñ

mire sāmne hazāroñ

na.e kaam aa paḌe haiñ

isī darmiyāñ tasavvur tirā baar baar aayā

isī rāste pe jānāñ

koī shaam phir hai aa.ī

tirī yaad nūr-paikar

tirī qurbatoñ kā saaya

kahīñ tīrgī meñ gum hai

maiñ azaan de rahā huuñ

kisī dasht-e-be-amāñ meñ

tujhe yaad karte karte

teri rah takte takte

mere ajnabi musafir

kai din guzar gae hain

koi sham aa rahi hai:

koi KHushnuma sitara jo falak pe hans raha hai kisi mah-jabin ki surat

jo nazar ko Das raha hai

wahi ek istiara

teri yaad rahguzar par mera ham-safar bana hai

wahi ek ziya salamat

sar-e-sham tirgi mein

mere kaam aa rahi hai

mere raste ke aage

kisi raat ka guzar hai

kahin wahm sar-ba-sar hai

kahin KHauf ka asar hai

kahin sarsarahaTen hain

kahin jhunjhunahaTen hain

nahin dasht-e-hu mein aahu

nahin jangalon mein jugnu

teri yaad wo khilauna jise toD bhi na paun

kahin chhoD bhi na paun

abhi nisf shab hai guzri

tujhe yaad kar raha hun tere KHwab dekhta hun

yahi jism hai bichhauna isi jaan ko oDhna hai

hui subh dar pe dastak

tere KHwab ja chuke hain

teri yaad bhi hai ruKHsat

nai aarzu khaDi hai

nae log mil gae hain

mere samne hazaron

nae kaam aa paDe hain

isi darmiyan tasawwur tera bar bar aaya

isi raste pe jaanan

koi sham phir hai aai

teri yaad nur-paikar

teri qurbaton ka saya

kahin tirgi mein gum hai

main azan de raha hun

kisi dasht-e-be-aman mein