dast-e-tah-e-sang-amada

bezār fazā darpa-e-āzār sabā hai

yuuñ hai ki har ik hamdam-e-derīna ḳhafā hai

haañ bāda-kasho aayā hai ab rañg pe mausam

ab sair ke qābil ravish-e-āb-o-havā hai

umDī hai har ik samt se ilzām kī barsāt

chhā.ī huī har daañg malāmat kī ghaTā hai

vo chiiz bharī hai ki sulagtī hai surāhī

har kāsa-e-mai zahr-e-halāhal se sivā hai

haañ jaam uThāo ki ba-yād-e-lab-e-shīrīñ

ye zahr to yāroñ ne ka.ī baar piyā hai

is jazba-e-dil kī na sazā hai na jazā hai

maqsūd-e-rah-e-shauq vafā hai na jafā hai

ehsās-e-ġham-e-dil jo ġham-e-dil kā sila hai

us husn kā ehsās hai jo terī atā hai

har sub.h-e-gulistāñ hai tirā rū-e-bahārīñ

har phuul tirī yaad kā naqsh-e-kaf-e-pā hai

har bhīgī huī raat tirī zulf kī shabnam

Dhaltā huā sūraj tire hoñToñ kī fazā hai

har raah pahuñchtī hai tirī chaah ke dar tak

har harf-e-tamannā tire qadmoñ kī sadā hai

ta.azīr-e-siyāsat hai na ġhairoñ kī ḳhatā hai

vo zulm jo ham ne dil-e-vahshī pe kiyā hai

zindān-e-rah-e-yār meñ pāband hue ham

zanjīr-ba-kaf hai na koī band-bapā hai

''majbūrī o davā-e-giraftārī-e-ulfat

dast-e-tah-e-sañg-āmada paimān-e-vafā hai''

bezar faza darpa-e-azar saba hai

yun hai ki har ek hamdam-e-derina KHafa hai

han baada-kasho aaya hai ab rang pe mausam

ab sair ke qabil rawish-e-ab-o-hawa hai

umDi hai har ek samt se ilzam ki barsat

chhai hui har dang malamat ki ghaTa hai

wo chiz bhari hai ki sulagti hai surahi

har kasa-e-mai zahr-e-halahal se siwa hai

han jam uThao ki ba-yaad-e-lab-e-shirin

ye zahr to yaron ne kai bar piya hai

is jazba-e-dil ki na saza hai na jaza hai

maqsud-e-rah-e-shauq wafa hai na jafa hai

ehsas-e-gham-e-dil jo gham-e-dil ka sila hai

us husn ka ehsas hai jo teri ata hai

har subh-e-gulistan hai tera ru-e-bahaarin

har phul teri yaad ka naqsh-e-kaf-e-pa hai

har bhigi hui raat teri zulf ki shabnam

Dhalta hua suraj tere honTon ki faza hai

har rah pahunchti hai teri chah ke dar tak

har harf-e-tamanna tere qadmon ki sada hai

tazir-e-siyasat hai na ghairon ki KHata hai

wo zulm jo hum ne dil-e-wahshi pe kiya hai

zindan-e-rah-e-yar mein paband hue hum

zanjir-ba-kaf hai na koi band-bapa hai

majburi o dawa-e-giraftari-e-ulfat

dast-e-tah-e-sang-amada paiman-e-wafa hai