dastak

kis ne darvāza khaTkhaTāyā hai

jā ke dekhūñ to kaun aayā hai

kaun aayā hai mere dvāre par

raat aa.ī kahāñ bichāre par

mere chhappar se Tek kar kāñdhā

kaun istāda hai thakā-māñda

merī kuTiyā meñ aao sustā lo

ye mirā sāġhar-e-shikasta lo

merī chhāgal se ghoñT paanī piyo

ik na.e azm kī javānī piyo

TimTimāte diye kī jhilmil meñ

jot sulgā lo ik na.ī dil meñ

ye mire āñsuoñ kī shabnam lo

paañv ke ābloñ kī marham lo

ye mujhe iftiḳhār do baiTho

sar se ga utaar do baiTho

mere zaanū par apnā sar rakh kar

taaq par kāhish-e-safar rakh kar

niiñd kī anjuman meñ kho jaao

manziloñ ke sapan meñ kho jaao

ḳhvāb vādī-o-kohsār ke ḳhvāb

dasht-o-dariyā-o-ābshār ke ḳhvāb

ḳhvāb añdherī tavīl rāhoñ ke

kunj-e-sahrā kī ḳhema-gāhoñ ke

jahāñ ik sham.a abhī farozāñ hai

jahāñ ik dil tapāñ hai sozāñ hai

tum lipaT jaao in ḳhayāloñ se

aur maiñ khelūñ tumhāre bāloñ se

sub.h jab nuur kā fusūñ barse

suunī pagDanDiyoñ pe ḳhuuñ barse

baag thāme hasīñ irādoñ kī

tum ḳhabar lo phir apne jādoñ kī

jab talak ziist kā safīna bahe

ajnabī ajnabī ko yaad rahe

mujh ko ye apnī yaad de jaao

aao bhī kyuuñ jhijhakte ho aao

tum kahāñ ho kahāñ javāb to do

o mire mehmāñ javāb to do

tum ne darvāza khaTkhaTāyā thā

kis kī dastak thī kaun aayā thā

nīm-shab qāfile sitāroñ ke

tez harkāre abr-pāroñ ke

kis ne nīndoñ ko merī Tokā thā

koī jhoñkā thā koī dhokā thā

kis ne darwaza khaTkhaTaya hai

ja ke dekhun to kaun aaya hai

kaun aaya hai mere dware par

raat aai kahan bichaare par

mere chhappar se Tek kar kandha

kaun istada hai thaka-manda

meri kuTiya mein aao susta lo

ye mera saghar-e-shikasta lo

meri chhagal se ghonT pani piyo

ek nae azm ki jawani piyo

TimTimate diye ki jhilmil mein

jot sulga lo ek nai dil mein

ye mere aansuon ki shabnam lo

panw ke aablon ki marham lo

ye mujhe iftiKHar do baiTho

sar se ga utar do baiTho

mere zanu par apna sar rakh kar

taq par kahish-e-safar rakh kar

nind ki anjuman mein kho jao

manzilon ke sapan mein kho jao

KHwab wadi-o-kohsar ke KHwab

dasht-o-dariya-o-abshaar ke KHwab

KHwab andheri tawil rahon ke

kunj-e-sahra ki KHema-gahon ke

jahan ek shama abhi farozan hai

jahan ek dil tapan hai sozan hai

tum lipaT jao in KHayalon se

aur main khelun tumhaare baalon se

subh jab nur ka fusun barse

suni pagDanDiyon pe KHun barse

bag thame hasin iradon ki

tum KHabar lo phir apne jadon ki

jab talak zist ka safina bahe

ajnabi ajnabi ko yaad rahe

mujh ko ye apni yaad de jao

aao bhi kyun jhijhakte ho aao

tum kahan ho kahan jawab to do

o mere mehman jawab to do

tum ne darwaza khaTkhaTaya tha

kis ki dastak thi kaun aaya tha

nim-shab qafile sitaron ke

tez harkare abr-paron ke

kis ne nindon ko meri Toka tha

koi jhonka tha koi dhoka tha