dastur sazi ki koshish

yuuñ to har shā.ir kī fitrat meñ hai kuchh dīvāngī

ġhair zimmedāriyāñ haiñ us kī juzv-e-zindagī

arz-e-sheristān meñ ye shā.irāna ḳhāsiyat

cancer kī tarah se jab phailne baḌhne lagī

muḳhtalif schōl jab jañgī akhāḌe ban ga.e

fikr-o-fan meñ jab nirājī kaifiyat paidā huī

mumlikat meñ zābta koī na jab baaqī rahā

har jagah qānūn kī hone lagī be-hurmatī

ek ik tuk-band ustādoñ ke muñh aane lagā

likh ke sub.h-o-shām nazmeñ be-tukī se be-tukī

kūḌe-karkaT kī tarah har sū nazar aane lageñ

Dheriyāñ hī Dheriyāñ dīvān-e-ḳhās-o-ām kī

had to ye hai ahl-e-machhlī-shahr bhī karne lage

māhī-gīrī chhoḌ kar din raat fikr-e-shā.irī

jin se bohrān-e-ġhizā state meñ paidā huā

qaht-e-māhī se baḌhī har chaar jānib bhuk-marī

chand qaumī dard rakhne vaale ahlurrā.e se

qaum kī nā-gufta-ba-hālat na jab dekhī ga.ī

ek dastūr-ul-amal tayyār karne ke liye

ik kametī 'amn'-sāhab kī sadārat meñ banī

taaki is par chal ke nazm-o-zabt aa.e qaum meñ

taaki kuchh to mo.atadil ho shā.iroñ kī zindagī

dūsre kāmoñ meñ bhī qaumī energy sarf ho

tuk faroshī ke alāva bhī to maqsad ho koī

daur-e-'aflātūn'-o-'tulsī-das' se 'iqbāl' tak

history kal shā.iroñ kī is kametī ne paḌhī

dūsre mulkoñ ke ā.īn-o-zavābit meñ jahāñ

jo munāsib baat thī vo chhāñT kar rakh lī ga.ī

raat din kī saḳht mehnat aur jāñ-sozī ke ba.ad

is kametī ne report apnī bil-āḳhir pesh kī

ḳhāka-e-dastūr-e-qaumī ya.anī vo she.rī report

'amn'-sāhab ne raqam kī thī ba-sinf-e-masnavī

is pe rā.e-āmma ma.alūm karne ke liye

shā.iroñ ko naql dastāvez kī bhejī ga.ī

muḳhtalif ahl-e-suḳhan ne apne apne taur par

raa.e dī dastūr meñ tarmīm yā tansīḳh kī

masnavī meñ ḳhāmiyāñ DhūñDeñ zabāñ kī jā-ba-jā

ek shā.ir ne jo the shāgird-e-nūh-nārvī

saikḌoñ misre badal kar rakh diye kuchh is tarah

nafs-e-mazmūñ nazr ho kar rah gayā islāh kī

un kā kahnā thā ki bandish chust honī chāhiye

sher ke andar balā se ho na fikrī tāzgī

na.at-go hazrāt kā kahnā thā shā.ir ke liye

shart avval hai ki ho jaa.e vo kaTTar maz.habī

āqibat kī baat soche aur munājāteñ likhe

us ke jan meñ kār-āmad shā.irī hai bas vahī

aise shā.ir jo ki haamī the taraqqī-vād ke

in kā kahnā thā ki shā.ir kā suḳhan ho maqsadī

ya.anī pahle se muqarrar-karda mauzuāt par

mumlikat meñ aam kī jaa.e shu.ūrī shā.irī

ḳhvāh sheristān meñ is kā na ho koī vajūd

lāziman dikhlā.ī jaa.e kashmakash tabqāt kī

ik qabīla jo muḳhālif thā shu.ūrī fikr kā

thā taraqqī-vādiyoñ se jis ko buġhz-e-lillāhī

is qabīle kā ye kahnā thā ki shā.ir kā kalām

lāziman ho ik muamma qaid-e-ma.anī se barī

jis ko shā.ir ḳhud na samjhe nazm kar lene ke ba.ad

jis ko paḌh kar gum ho aql-e-maulvī-e-ma.anavī

dekh kar dastūr meñ nazm-o-nasq kā tazkira

saḳht barham ho ga.e kul shā.irān-e-naksalī

in kā nukta thā ki shā.ir fitratan āzād hai

us pe lag saktī nahīñ pābandiyāñ tanzīm kī

zindagī meñ zābta laane ke bilkul the ḳhilāf

saath naksal-vādiyoñ ke dūsre hazrāt bhī

muḳhtasar ye hai ki sab ne rad kiyā dastūr ko

saarī mehnat 'amn'-sāhab kī akārat ho ga.ī

dekh kar nā-āqibat andeshī-e-ahl-e-suḳhan

is tarah goyā huī un kī mohazzab ḳhāmushī

meñDakoñ ko taulnā āsāñ nahīñ hai jis tarah

shā.iroñ ko bhī munazzam karnā mushkil hai yūñhī

yun to har shair ki fitrat mein hai kuchh diwangi

ghair zimmedariyan hain us ki juzw-e-zindagi

arz-e-sheristan mein ye shairana KHasiyat

cancer ki tarah se jab phailne baDhne lagi

muKHtalif school jab jangi akhaDe ban gae

fikr-o-fan mein jab niraji kaifiyat paida hui

mumlikat mein zabta koi na jab baqi raha

har jagah qanun ki hone lagi be-hurmati

ek ek tuk-band ustadon ke munh aane laga

likh ke subh-o-sham nazmen be-tuki se be-tuki

kuDe-karkaT ki tarah har su nazar aane lagen

Dheriyan hi Dheriyan diwan-e-KHas-o-am ki

had to ye hai ahl-e-machhli-shahr bhi karne lage

mahi-giri chhoD kar din raat fikr-e-shairi

jin se bohran-e-ghiza state mein paida hua

qaht-e-mahi se baDhi har chaar jaanib bhuk-mari

chand qaumi dard rakhne wale ahlurrae se

qaum ki na-gufta-ba-haalat na jab dekhi gai

ek dastur-ul-amal tayyar karne ke liye

ek kameti 'amn'-sahab ki sadarat mein bani

taki is par chal ke nazm-o-zabt aae qaum mein

taki kuchh to moatadil ho shairon ki zindagi

dusre kaamon mein bhi qaumi energy sarf ho

tuk faroshi ke alawa bhi to maqsad ho koi

daur-e-'aflatun'-o-'tulsi-das' se 'iqbaal' tak

history kal shairon ki is kameti ne paDhi

dusre mulkon ke aain-o-zawabit mein jahan

jo munasib baat thi wo chhanT kar rakh li gai

raat din ki saKHt mehnat aur jaan-sozi ke baad

is kameti ne report apni bil-aKHir pesh ki

KHaka-e-dastur-e-qaumi yani wo sheri report

'amn'-sahab ne raqam ki thi ba-sinf-e-masnawi

is pe rae-amma malum karne ke liye

shairon ko naql dastawez ki bheji gai

muKHtalif ahl-e-suKHan ne apne apne taur par

rae di dastur mein tarmim ya tansiKH ki

masnawi mein KHamiyan DhunDen zaban ki ja-ba-ja

ek shair ne jo the shagird-e-nuh-narwi

saikDon misre badal kar rakh diye kuchh is tarah

nafs-e-mazmun nazr ho kar rah gaya islah ki

un ka kahna tha ki bandish chust honi chahiye

sher ke andar bala se ho na fikri tazgi

nat-go hazraat ka kahna tha shair ke liye

shart awwal hai ki ho jae wo kaTTar mazhabi

aaqibat ki baat soche aur munajaten likhe

us ke jan mein kar-amad shairi hai bas wahi

aise shair jo ki hami the taraqqi-wad ke

in ka kahna tha ki shair ka suKHan ho maqsadi

yani pahle se muqarrar-karda mauzuat par

mumlikat mein aam ki jae shuuri shairi

KHwah sheristan mein is ka na ho koi wajud

laziman dikhlai jae kashmakash tabqat ki

ek qabila jo muKHalif tha shuuri fikr ka

tha taraqqi-wadiyon se jis ko bughz-e-lillahi

is qabile ka ye kahna tha ki shair ka kalam

laziman ho ek muamma qaid-e-mani se bari

jis ko shair KHud na samjhe nazm kar lene ke baad

jis ko paDh kar gum ho aql-e-maulwi-e-manawi

dekh kar dastur mein nazm-o-nasq ka tazkira

saKHt barham ho gae kul shairan-e-naksali

in ka nukta tha ki shair fitratan aazad hai

us pe lag sakti nahin pabandiyan tanzim ki

zindagi mein zabta lane ke bilkul the KHilaf

sath naksal-wadiyon ke dusre hazraat bhi

muKHtasar ye hai ki sab ne rad kiya dastur ko

sari mehnat 'amn'-sahab ki akarat ho gai

dekh kar na-aqibat andeshi-e-ahl-e-suKHan

is tarah goya hui un ki mohazzab KHamushi

meinDakon ko taulna aasan nahin hai jis tarah

shairon ko bhi munazzam karna mushkil hai yunhi