waqt ki sadiyan

na jaane kitnī sadiyoñ se zamāna

misāl-e-mauj bahtā aa rahā hai

sukūñ kā rañg us ko kab milā hai

pareshāñ hai ye kyuuñ kis ko patā hai

ye betābī har ik lamhe kī kyā hai

kabhī aisā bhī hotā hai ki dariyā

liye tūfāñ hazāroñ apne andar

sukūñ se par nazar aatā hai bāhar

kabhī aisā bhī hotā hai zamāna

kashākash se bharā hotā hai lekin

nazar aatā hai ik nuqte pe sākin

zamāna kab magar sākin rahā hai

ki chaltā hī rahā hai ye zamāna

damā-dam pai-ba-pai lamha-ba-lamha

kabhī aisā bhī hotā hai ki raahī

nazar aatā hai kuchh ruktā huā sā

hirāsāñ muzmahil thaktā huā sā

magar raahī safar meñ kab rukā hai

ki raahī zindagī kā gar rukegā

yaqīnan apnī manzil par rukegā

magar ye zindagī to be-karāñ hai

nigāh-e-shauq kī manzil kahāñ hai

ki har manzil faqat vahm-o-gumāñ hai

ye hastī jehd-e-ġham kī dāstāñ hai

ba-zāhir hai subuk raftār-o-kamzor

ġhanīm-e-shauq ho madd-e-muqābil

to us kā har-nafas ātish-fishāñ hai

hai yuuñ to zindagī kitnī subuk-rau

ajab ik ek lamhe kī tag-o-dau

ye ik lamha guzartā hī nahīñ hai

magar jab is nazar ke sāmne se

guzartī hai ḳhirad bijlī kī sūrat

dikhā kar ik anokhā sā karishma

to yuuñ mahsūs hotā hai ki jaise

zamāna kitnā aage jā chukā hai

zamāna aur bhī aage baḌhegā

liye bāham subuk-raftār lamhe

guzartā jā.egā sadiyoñ ko rauñde

ḳhirad kī rahnumā.ī ke sahāre

na jaane kitni sadiyon se zamana

misal-e-mauj bahta aa raha hai

sukun ka rang us ko kab mila hai

pareshan hai ye kyun kis ko pata hai

ye betabi har ek lamhe ki kya hai

kabhi aisa bhi hota hai ki dariya

liye tufan hazaron apne andar

sukun se par nazar aata hai bahar

kabhi aisa bhi hota hai zamana

kashakash se bhara hota hai lekin

nazar aata hai ek nuqte pe sakin

zamana kab magar sakin raha hai

ki chalta hi raha hai ye zamana

dama-dam pai-ba-pai lamha-ba-lamha

kabhi aisa bhi hota hai ki rahi

nazar aata hai kuchh rukta hua sa

hirasan muzmahil thakta hua sa

magar rahi safar mein kab ruka hai

ki rahi zindagi ka gar rukega

yaqinan apni manzil par rukega

magar ye zindagi to be-karan hai

nigah-e-shauq ki manzil kahan hai

ki har manzil faqat wahm-o-guman hai

ye hasti jehd-e-gham ki dastan hai

ba-zahir hai subuk raftar-o-kamzor

ghanim-e-shauq ho madd-e-muqabil

to us ka har-nafas aatish-fishan hai

hai yun to zindagi kitni subuk-rau

ajab ek ek lamhe ki tag-o-dau

ye ek lamha guzarta hi nahin hai

magar jab is nazar ke samne se

guzarti hai KHirad bijli ki surat

dikha kar ek anokha sa karishma

to yun mahsus hota hai ki jaise

zamana kitna aage ja chuka hai

zamana aur bhi aage baDhega

liye baham subuk-raftar lamhe

guzarta jaega sadiyon ko raunde

KHirad ki rahnumai ke sahaare