dead-house

hanūt jismoñ ke kār-ḳhāne meñ

laash rakkhī huī hai kis kī

safed kāġhaz badan pe kis ne

sitam ke sab naam likh diye haiñ

ye phuul kal tak sahar ke āñgan meñ khil rahā thā

magar siyāhī ke tañg halqoñ meñ ghir gayā thaa!

ki ḳhvāb zanjīr ban ga.e the

azaab ta.abīr ban ga.e the

kitāb kā gard-posh jaise shikasta ho kar bikhar gayā ho

ye kis ibārat ke dā.ere ab kisī shahādat ke nāma-bar haiñ

falak se pūchhūñ to kaise pūchhūñ

ki marne vaale ne zindagī kī talāsh kī thī

to maut taqdīr kyuuñ huī thī

vo haath kab tak qalam na hoñge

jo zard jismoñ ko nīl-gūñ zaḳhm de rahe haiñ

hanut jismon ke kar-KHane mein

lash rakkhi hui hai kis ki

safed kaghaz badan pe kis ne

sitam ke sab nam likh diye hain

ye phul kal tak sahar ke aangan mein khil raha tha

magar siyahi ke tang halqon mein ghir gaya tha!

ki KHwab zanjir ban gae the

azab tabir ban gae the

kitab ka gard-posh jaise shikasta ho kar bikhar gaya ho

ye kis ibarat ke daere ab kisi shahadat ke nama-bar hain

falak se puchhun to kaise puchhun

ki marne wale ne zindagi ki talash ki thi

to maut taqdir kyun hui thi

wo hath kab tak qalam na honge

jo zard jismon ko nil-gun zaKHm de rahe hain