december mujhe ras aata nahin

ka.ī saal guzre

ka.ī saal biite

shab-o-roz kī gardishoñ kā tasalsul

dil-o-jān meñ sāñsoñ kī parteñ ulTe hue

zalzaloñ kī tarah hāñptā hai

chaTaḳhte hue ḳhvāb

āñkhoñ kī nāzuk rageñ chhīlte haiñ

magar maiñ ik saal kī god meñ jāgtī sub.h ko

be-karāñ chāhatoñ se aTī zindagī kī duā de kar

ab tak vahī justujū kā safar kar rahā huuñ

guzartā huā saal jaisā bhī guzrā

magar saal ke āḳhirī din

nihāyat kaThin haiñ

mire milne vaalo

na.e saal kī muskurātī huī sub.h gar haath aa.e

to milnā

ki jaate hue saal kī sā.atoñ meñ

ye bujhtā huā dil

dhaḌaktā to hai muskurātā nahīñ

december mujhe raas aatā nahīñ

kai sal guzre

kai sal bite

shab-o-roz ki gardishon ka tasalsul

dil-o-jaan mein sanson ki parten ulTe hue

zalzalon ki tarah hanpta hai

chaTaKHte hue KHwab

aankhon ki nazuk ragen chhilte hain

magar main ek sal ki god mein jagti subh ko

be-karan chahaton se aTi zindagi ki dua de kar

ab tak wahi justuju ka safar kar raha hun

guzarta hua sal jaisa bhi guzra

magar sal ke aaKHiri din

nihayat kaThin hain

mere milne walo

nae sal ki muskuraati hui subh gar hath aae

to milna

ki jate hue sal ki saaton mein

ye bujhta hua dil

dhaDakta to hai muskuraata nahin

december mujhe ras aata nahin