decline

maiñ jiine kī tamannā le ke uThtī huuñ

magar jab din guzartā hai

sunahrī dhuup kī kirneñ kisī dariyā kināre par utartī shaam ke bikhre hue chamkīle bāloñ se lipaT kar sone lagtī haiñ

havā bezār ho kar phir thake panchhī kī bāñhoñ meñ simaT kar baiTh jaatī hai

zamīñ kā shor bhī tab rafta rafta maañd paḌtā hai

falak ke āḳhirī kone pe jis dam kuchh syāhī jhilmilātī hai

sitāre surma.ī se āsmānoñ kī bichhī chādar pe aise baiTh jaate haiñ

ki jaise Dūbte sūraj kī mayyat par sipāre paḌhne aa.e hoñ

tabhī ehsās hotā hai ki goyā zindagī bas ek din kī thī

main jine ki tamanna le ke uThti hun

magar jab din guzarta hai

sunahri dhup ki kirnen kisi dariya kinare par utarti sham ke bikhre hue chamkile baalon se lipaT kar sone lagti hain

hawa bezar ho kar phir thake panchhi ki banhon mein simaT kar baiTh jati hai

zamin ka shor bhi tab rafta rafta mand paDta hai

falak ke aaKHiri kone pe jis dam kuchh syahi jhilmilati hai

sitare surmai se aasmanon ki bichhi chadar pe aise baiTh jate hain

ki jaise Dubte suraj ki mayyat par sipare paDhne aae hon

tabhi ehsas hota hai ki goya zindagi bas ek din ki thi