mera watan

aiman kā nuur agar hai to mere vatan meñ hai

ab tak bhī shān-e-tūr isī ujḌe chaman meñ hai

donoñ haiñ terī yaad meñ ālūda-e-ġharaz

jo aib shaiḳh meñ hai vahī barhaman meñ hai

lipTā huā hai daur-e-ḳhizāñ bhī bahār se

donoñ kā rañg lāla-e-ḳhūnīñ-kafan meñ hai

kyuuñ dil meñ DhūñDte ho shagufta-mizājiyāñ

pahlī sī ab bahār kahāñ is chaman meñ hai

zarre chamak rahe haiñ tirī rahguzār ke

hai terā naqsh-e-pā ki charāġh anjuman meñ hai

nākām hasratoñ kī yahī to hai yādgār

dāġhoñ kā jo hujūm dil-e-pur-mehan meñ hai

ye bhī ḳhabar hai gauhar-e-maqsad nahīñ yahāñ

dil terā phir bhī ġharq furāt-o-jaman meñ hai

azm-e-safar bahār meñ ai 'arsh' kis liye

duniyā kī har bahār bahār-e-vatan meñ hai

aiman ka nur agar hai to mere watan mein hai

ab tak bhi shan-e-tur isi ujDe chaman mein hai

donon hain teri yaad mein aaluda-e-gharaz

jo aib shaiKH mein hai wahi barhaman mein hai

lipTa hua hai daur-e-KHizan bhi bahaar se

donon ka rang lala-e-KHunin-kafan mein hai

kyun dil mein DhunDte ho shagufta-mizajiyan

pahli si ab bahaar kahan is chaman mein hai

zarre chamak rahe hain teri rahguzar ke

hai tera naqsh-e-pa ki charagh anjuman mein hai

nakaam hasraton ki yahi to hai yaadgar

daghon ka jo hujum dil-e-pur-mehan mein hai

ye bhi KHabar hai gauhar-e-maqsad nahin yahan

dil tera phir bhi gharq furaat-o-jaman mein hai

azm-e-safar bahaar mein ai 'arsh' kis liye

duniya ki har bahaar bahaar-e-watan mein hai