dev-malayen sachchi hoti hain

ghaḌī do ghaḌī kī masarrat

ye sadiyoñ pe phailā huā dev-qissa hamāre lahū meñ ravāñ hai

kisī ghoñsle meñ se anDe churātā huā sūrmā

ek chīte se gur sīkhtā koī bachcha

kamāñ khīñchtā aur maada ko nāvak se nīche girātā huā

aag daryāft kartā huā koī laḌkā

ajab sūrateñ haiñ

shab-e-dāstañ-goī sadiyoñ pe phailī huī hai

havā marġh-zāroñ kī yaḳh-bastagī meñ nahīñ rah sakī

so yahāñ aa ga.ī hai ki apnā badan garm kar le

ye aag ab jibillat kī tartīb kā lāzima hai

bahīmāna ḳhaslat ko taskīn detā huā ek unsur

havā dev-malāoñ ke daur kī ek buḌhiyā hai

jis ko har ik dāstāñ yaad hai

ye ghaḌī do ghaḌī kī masarrat

jise dāstāñ-go kī bātoñ se ham ne kiyā hai kashīd

ek din aa.egā jab havā apne qisse meñ vo sūrateñ lā.egī

jin kā ā.īna ham haiñ

shab-e-dāstañ-goī meñ ham jo mab.hūt o hairān baiThe hue

dāstān sun rahe haiñ

kabhī ek ThiThurī huī raat meñ ham kahānī kā markaz baneñge

jo bachche adam haiñ

hameñ dāstāñ meñ ghirā dekh kar khilkhilā.eñge

mab.hūt-o-hairāñ hoñge

ghaDi do ghaDi ki masarrat

ye sadiyon pe phaila hua dew-qissa hamare lahu mein rawan hai

kisi ghonsle mein se anDe churaata hua surma

ek chite se gur sikhta koi bachcha

kaman khinchta aur mada ko nawak se niche giraata hua

aag daryaft karta hua koi laDka

ajab suraten hain

shab-e-dastan-goi sadiyon pe phaili hui hai

hawa margh-zaron ki yaKH-bastagi mein nahin rah saki

so yahan aa gai hai ki apna badan garm kar le

ye aag ab jibillat ki tartib ka lazima hai

bahimana KHaslat ko taskin deta hua ek unsur

hawa dew-malaon ke daur ki ek buDhiya hai

jis ko har ek dastan yaad hai

ye ghaDi do ghaDi ki masarrat

jise dastan-go ki baaton se hum ne kiya hai kashid

ek din aaega jab hawa apne qisse mein wo suraten laegi

jin ka aaina hum hain

shab-e-dastan-goi mein hum jo mabhut o hairan baiThe hue

dastan sun rahe hain

kabhi ek ThiThuri hui raat mein hum kahani ka markaz banenge

jo bachche adam hain

hamein dastan mein ghira dekh kar khilkhilaenge

mabhut-o-hairan honge