dharm-o-iman

bahut din se vatan meñ ik mahāz-e-jañg qaa.em hai

kahīñ hai dharm ko ḳhatra kahīñ īmān ko ḳhatra

bapā hai saḳht tūfāñ rūnumā haiñ saḳht hañgāme

kahīñ hai ved ko ḳhatra kahīñ qur.ān ko ḳhatra

kahīñ masjid ko ḳhatra hai shivāle ke mahantoñ se

kahīñ hai ḳhānqah vāloñ se dev asthān ko ḳhatra

kahīñ muslim ko ḳhatra apne īmānī tahaffuz kā

kahīñ hindū ke pūjā-pāT ke sammān ko ḳhatra

kahīñ shuddhī ke parchārak ko ḳhatra dharm rakshā kā

kahīñ tablīġh ke jhanDe kī ān-bān ko ḳhatra

nahīñ hotā koī aisā minute chaubīs ghanTe meñ

na rahtā ho vatan vāloñ ke māl-o-jān ko ḳhatra

ye saarī pesh-bañdī hai faqat is baat kī ḳhātir

ki lāhaq ho na british raaj ke aivān ko ḳhatra

ye Thekedār diin aur dharm ke is ke bhī zāmin haiñ

na paidā ho mafād-e-ahal-e-inglistān ko ḳhatra

ye ḳhāna-jañgiyāñ jitnī haiñ sab kā mudda.ā ye hai

na hargiz rūnumā ho jaan bal kī jaan ko ḳhatra

ġhulāmān-e-azal ya.anī ye jhūTe peshvā-e-dīñ

lagā rahtā hai har dam jin ke dastar-ḳhvān ko ḳhatra

vo kab chāheñge koī is tarah kā inqalāb aa.e

ki ho mahsūs un ke amn-o-itmīnān ko ḳhatra

hamārā farz hai ham un lafangoñ ko fanā kar deñ

ki hai un sab ke sab se aam hindostān ko ḳhatra

bahut din se watan mein ek mahaz-e-jang qaem hai

kahin hai dharm ko KHatra kahin iman ko KHatra

bapa hai saKHt tufan runuma hain saKHt hangame

kahin hai wed ko KHatra kahin quran ko KHatra

kahin masjid ko KHatra hai shiwale ke mahanton se

kahin hai KHanqah walon se dew asthan ko KHatra

kahin muslim ko KHatra apne imani tahaffuz ka

kahin hindu ke puja-paT ke samman ko KHatra

kahin shuddhi ke parchaarak ko KHatra dharm raksha ka

kahin tabligh ke jhanDe ki aan-ban ko KHatra

nahin hota koi aisa minute chaubis ghanTe mein

na rahta ho watan walon ke mal-o-jaan ko KHatra

ye sari pesh-bandi hai faqat is baat ki KHatir

ki lahaq ho na british raj ke aiwan ko KHatra

ye Thekedar din aur dharm ke is ke bhi zamin hain

na paida ho mafad-e-ahal-e-inglistan ko KHatra

ye KHana-jangiyan jitni hain sab ka muddaa ye hai

na hargiz runuma ho jaan bal ki jaan ko KHatra

ghulaman-e-azal yani ye jhuTe peshwa-e-din

laga rahta hai har dam jin ke dastar-KHwan ko KHatra

wo kab chahenge koi is tarah ka inqalab aae

ki ho mahsus un ke amn-o-itminan ko KHatra

hamara farz hai hum un lafangon ko fana kar den

ki hai un sab ke sab se aam hindostan ko KHatra